Champions League duhtu Ancelotti

Carlo Ancelotti chuan kumina Bayern Munich tum ber tur pakhat chu Champions League nomawi chawi a nih tur thu a sawi chhuak.

German club Bayern hian Pep Guardiola hnuai-ah tun hnai season thum chhung chu Champions League semifinal an lut ziah a, final erawh an lut miah lo. Kuminah hian Italian manager thar hnuaiah hian an thlen chin aṭanga hmasawn an tum dawn a ni.

AC Milan leh Real Madrid pawh lo enkawl tawhtu coach chuan, "Bayern tum ber pakhat chu Champions League nomawi chawi a ni. Tun hnaiah thil eng emaw hote vangin final an lut lo fo a, kuminah siamṭhat kan tum ang," tiin a sawi.

Kuminah Bayern hi Group D-ah Atletico Madrid, PSV Eindhoven leh FC Rostov te nen an awm ho a, nikum semifinal aṭanga pet chhuaktu Atletico nen an awmdun avangin group stage aṭangin inelna hautak an hmachhawn dawn tihna a ni ang.