Africa Cup of Nations Champion lai Ivory Coast an tling

Africa Cup of Nations 2017 khel turin champion lai Ivory Coast chuan Sier-ra Leone chu Aston Villa striker Jonathan Kodjia goal hmangin 1-1 in an inhnehtawkpui a, an nomawi kawl lai humhim thei turin an tling chiang ta.

Inkhel dangah Senegal chuan Namibia 2-0 in an lo hneh ve bawk a, anni chiah hi qualifying-a hneh loh nei loa inpet tling awmchhun an ni. Africa Cup of Nations khel tur hian ram hrang hrang 51 te chu group 13-ah ṭhen hran an ni a, group tina hmahruaitu ṭheuh bakah group tina pahnihna ni zinga point hmu ṭha pahnih an tling bawk ang.

Nakkum January 14 - February 5 chhung hian Africa Cup of Nations chu Gabon-ah nghah a ni dawn a, ram 16 an inel ang. Tun thlengin a thlengtu ram bakah hian Morocco, Algeria, Cameroon, Senegal, Egypt, Ghana, Guinea-Bissau, Zimbabwe, Mali leh Ivory Coast te an inpet tling tawh a, hmunruak panga a la awm.

Inelna tak khel tura tling ram 16 te chu group hrang paliah ṭhen hran an ni leh dawn a, group match thum ṭheuh an khelh hnuah a sang pahnih ten quarterfinal an lut zel dawn a ni.