Puerto Rico hmaah India leh India an pâwr
India ram football chanchin sawi chuan Jeje Lalpekhlua hming lam rik tel zel a ngai tawh. Bollywood star lar leh Chennaiyin FC neitu zinga mi ni bawk Abhishek Bachchan te meuhin Jeje-a jersey keng chunga, "Jeje-a'n goal a khung leh ngei ka beisei," tia Mizo tlangval inkhel lai an en tawh a nih chuan mipui tluklehdingawn khat aia tam awmna India ram football hi Jeje-a tel loin a kim tawh lo tih hai rual a ni lo.
Inrinni zan khan India chuan FIFA ranking-a 38 zeta sang zawk Puerto Rico an mikhual a, Mumbai Football Arena-a friendly match-ah hian 4-1 in hnehna an chang - Mizo tlangval Jeje Lalpekhlua'n a dan pangngaiin goal a khung a, Serchhip tlangval Daniel Lalhlimpuia chuan bench aṭanga bul ṭanin India tana a match hmasa ber a khel bawk.
Thawhlehna ropui
Kum 61 hnua Mumbai khaw-puiin international match-a thlen lehna hmasa ber inkhelah mipui an tam a, chak beiseina nen an thawm a ṭha hle - mahse, ṭan aṭanga minute 8-na lekah mikhual team-in Emmanuel Sanchez-a penalty chhuih luh hmangin goal an khung nghal a, FIFA ranking-a 114-na team hian 152-naa awm India an chhuk en.
Mahni khelmuala tlawm nih India-in an duh lo a, Puerto Rico goal khung hi Blue Tigers chhaih kawltu mai a ni - goal luh aṭangin minute 10 a liam hman chauh tihah Sunil Chhetri chuan freekick hmangin post a pet per a, a per lehlam hi Narayan Das chuan India si phurh sut nan a khung.
Sunil Chhetri a hmuhnawm chhunzawm a, Bengaluru captain hian minute 26-naah freekick a-
ṭangin goal 'special' a khung a, India-in hma an hruai. Minute 34-na a thleng a, Jeje Lalpekhlua inlar hun a ni - Chennaiyin striker hian Chhetri-a ball tauh ṭha tak chu harsatna nei loin Puerto Rico goal-ah a tauh lut a, India tan a match hnuhnung pasarihah goal sarih a khung ta. Chawlhlawk hman a nih hnuah India tan Jackichand Singh chuan minute 58-naah ram tana a goal hmasa ber a khung bawk a, India an chak chiang hle.
Jeje leh Chhetri
India coach Stephen Constan-tine-a'n 4-2-3-1 formation hmangin tlar hmaah Jeje Lalpekhlua a maltlat tir a, a hnung chiah Mizo tlangval thlawp turin Sunil Chhetri dah a ni a, a sirah Bikash Jairu leh Jackichand Singh te an awm bawk.
Inkhel pumpui thlirin English manager hian duh a thlang sual lo tih a lang a, tlar hmaa inkawp player-te an inman a, a bik takin Jeje-a goal khungna tura Sunil Chhetri leh Mizo tlangval te ball inpek dan a mawi a, striker pahnih hi India tan an la vul dawn chauh niin a lang.
Mizo tlangval Jeje-a'n goal a khung bakah a tharum ngahna leh chakna hmangin Puerto Rico tlar hnung vawitam a chhaih mangang a, inkhel ṭantirha Pronay Halder tana a siamsak goal lo te, Jackichand-a'n Jeje-a hnen aṭanga ball ṭha tak a hmuh hnua a pet over te chu goal se chuan Mizo tlangval hming-
ṭhatna belhchhah thei tur an ni a, Sunil Chhetri-a'n mawi taka ball a pek hnua Jeje-a'n a pet over leh goalkeeper Christopher Ecchevaria-a'n a shot ṭha tak a kea a lo dan hman te chu uiawm tak a ni.
Jeje a phur
Jeje Lalpekhlua'n India tana a match hnuhnung pasarihah goal sarih a khung a, official match ni lo Bhutan nena an inkhel thlir tel phei chuan India tana a match hnuhnung pariatah goal riat a khung - ram tana inlan phak pawh a harsa a, Jeje-a hlawhtlinna ang hi striker naran tan tih theih chi a ni lo.
Indian player of the year Jeje chuan, "Heti taka goal ka khung tluan hi ka ring hran lo a, ka lawm takzet a ni. Ka sawi fo tawh angin ka thawkrim em em a, ka thawhrimna Pathianin mal a sawm a ni," tiin Vanglaini palai hnenah a sawi.
Mumbai Football Arena-a in-khel hi hming langsar tak tak Bollywood actor Abhishek Bach---chan, director lar Rohit Shetty, Shiv Sena chief Uddhav Thackeray leh AIFF president Praful Patel ten a hmunah an en a, mipui thawm a ring hle bawk.
Pune FC-a a professional career ṭantu Jeje chuan, "Khatiang taka mipui an tam kha ka beisei lo a, khelmual kha a nuam em em bawk. India football-ah chuan khatiang taka ṭawiawmtu neih
ṭhat kha thil thleng zen zen lo a ni a, nuam ti takin kan khel a ni. Kei phei chu Mumbai Mizo ten min ṭawiawm nasa a, an chungah ka lawm hle a ni," tiin stadium boruak chuan player-teah phurna a pek thu Vanglaini palai a hrilh.
Hmasawnna duhawm
Jeje chuan chak phu zawkin hnehna an changa a hriat thu sawiin, "A tirah talbuai deuh mah ila, goal kan chhuah hnuah kan insiamṭha vat a, chak phu zawkin hnehna kan chang a ni. India football hian game-ah mai ni lo, hmanraw neih ṭhat thlengin hma kan sawn nasa a, chu chu khelmualah a lang zel a ni. Stephen Constantine hian player naupang zawkte chungah rinna nghat ngamin chance min pe nasa a, practice naah rim takin min thawh pui bawk a, chumi rah chu a lang niin ka hria," a ti a, nakkum February-a a contract zo tawh tur English coach chu Vanglaini palai hnenah a fak.
Indian Super League khel tura inbuatsaih Jeje hian nimin zing khan Italy-a training nei mek Chennaiyin squad zawm turin India a chhuahsan ve lehnghal a, amah ṭawngṭaipui ṭhintu Mizo mipuite chungah lawmthu sawiin lo ṭawiawm chhunzawm zel turin a ngen nghal bawk.
India tana Jeje-a
match hnuhnung pasarih
SAFF Championship
31 December 2015, Trivandrum
India 3-2 Maldives (2 goals)
3 January 2016, Trivandrum
India 2-1 Afghanistan (1 goal)
World Cup Qualifier
24 March 2016, Tehran
Iran 4-0 India
29 March 2016, Kochi
India 1-2 Turkmenistan
Asian Cup Qualifier
2 June 2016, Vientiane
Laos 0-1 India (1 goal)
7 June 2016, Guwahati
India 6-1 Laos (2 goals)
International Friendly match
3 September 2016, Mumbai
India 4-1 Puerto Rico (1 goal)
Note: August 13-a India-in Bhutan 3-0 a an hnehna inkhelah Jeje-a'n goal khung mah se official match a nih loh avangin chhiar tel a ni lo.