Hnehna chang hnem ber Serena

Serena Williams chuan Grand Slam inelna ringawtah pawh match 307 zet hnehna a chang tling ta. American star hian Sweden nula Johanna Larsson chu 6-2. 6-1 a hnehin US Open 2016 last 16 a inhlangkai.

World number 1 Serena hian kum 1998 Australian Open khan a vawi khat nan Grand Slam tournament-ah hnehna changin tunah chuan match 307 zet a chak ta a, hmeichhe tennis player zinga hnehna chang hnem ber Martina Navratilova-i record match 306 a rawn khum ta a ni - Open Era bikah chuan hmeichhe zingah ani aia hnehna chang tam an awm ta lo! Serena hian hmeichhe record a siam thar a ni satliah lo a, Grand Slam vawi 17 champion tawh Roger Federer record a nih rual chiah bawk.

Kum 34-a upa Serena hian major title ringawt pawh 22 a la tawh a, German hranghlui Steffi Graf record (22) a tluk tawh, nomawi dang pakhat pawh a chawi belh leh a nih chuan khawvela hmeichhe tenis star zinga sulhnu nei ṭha fal ber a ni chiang hle ang.

US Open vawi ruk champion tawh Serena chuan, "Bul ka lo ṭan tawhna hmuna hetiang dinhmun ka tawng leh thei hi ka lawm hle, mipa leh hmeichhe zingah pawh nise hnehna chang tam nih hi a hluin a ropui a ni," a ti. Serena hian kum 1999 khan a vawi khan nan US Open a chawi a ni.