Mahrez vanga Foxes pan Slimani

Leicester City player manto ber ni tura pound maktaduai 29-a King Power Stadium pantu, Islam Slimani chuan Foxes pan tura thutlukna a siamna kawngah Riyad Mahrez-a'n hmun pawimawh tak a chan thu a sawi.

Algeria tana Mah-rez-a khelhpui ṭhin striker chuan, "Ka ṭhian ṭha tak Mahrez hian Foxes chanchin min hrilh nasain club nuam leh ṭha tak an nih thu min hrilh ṭhin. Ram tan mai ni lo, club tana Mahrez nena kan kheldun thei tur hian minti hlim hle a ni," a ti.

Kum 28-a upa striker chuan sawi chhunzawmin, "Leicester hi Premier League champion an ni tih kan hre vek a, player ṭha zawk ni turin he hmun hi ka pan a ni. League nomawi kan humhim theih nan theihtawp ka chhuah ang," tiin Foxes-ah chuan champion tuma kal a nih thu a sawi.