Tlai dar 4-ah AFC Vs Army Red

Durand Cup-ah Aizawl FC-in Inrinni khan Neroca an hneh lo a, vawiin tlai dar 4:00 hian Ambedkar Stadium, Delhi-ah Army Red an hmachawn leh ang.

AFC-in Dempo SC leh Indian Air Force an hneh tawh avangin Army Red an hneh chuan semifinal lut turin dinhmun ṭha takah an ding dawn tho a, Manipur club hneh loh vangin MPL champion hmalam a thim phah lo.

Aizawl FC technical director Hming-thansanga chuan, "Goal chance chu kan nei ve tho a, mah se chak phu zawk an chak a ni. Ricky awm loh kan tuar a, kan chauh vanga chak lo kan ni," tiin Vanglaini palai a hrilh.

Manipur club Neroca chakna goal hi Mizo tlangval David Lalbiakzara'n minute 11-naa box pawn aṭanga nalh taka a khung a ni.

Mizo club hian MFA Super Cup an champion aṭanga ni hnihnaah Dempo an hneh nghal a, amaherawhchu hemi hmaa I Day Football an champion dante leh an zin chhung nena chhut phei chuan AFC player-te hi an chau dawn tih a chiang. Harsatna belhchhah turin Ricky Lallawmawma chu hrem vangin a inlan thei lo a, AFC technical director Hmingthana chhuanlam hi a satliah lo nachungin Mizoram hmel an ni tih erawh hriat reng a ṭul.

Vawiin tlaia AFC hmachhawn tur Army Red-ah hian Mizo pali Zothanpuia (Thangpuia), Francis Zonuntluanga, Ramniengmawia leh Lallianmawia te an awm. Chanmari FC captain hlui Thangpuia leh Francis te hi MPL ngainatute zingah an hming sawi nawn a ṭul lo a, Mawia leh Lianmawia te hi Santosh Trophy-a Services champion pui tawhtu an nih avangin an team khelh meknaah chuan tawnhriat nei ṭha zawk an ni.