Big Sam-a hnuaiah England chak hram

England-in Sam Allardyce-a hnuaia an match hmasak berah chak turin vanneihna an mamawh a, injury time-a Adam Lallana goal hmangin player 10-a khel Slovakia 1-0 in an hneh.

2018 FIFA World Cup qualifier hi October 8-ah khelh leh a ni dawn a, England hian Scotland laka 5-1 zeta tlawm Malta an mikhual ang. Group F inkhel dangah hian Lithuania leh Slovenia te 2-2 in an inhnehtawk bawk.

Ram tan Lallana

Trnava-ah Slovakia-in Pathianni zan khan England an mikhual a, ram pahnih hi Euro 2016-ah khan group stage-ah goal awm loin an inhnehtawk. Big Sam-a hnuaia khel England-in Slovakia tlar hnung ṭhiah an harsat a, minute 57-naa captain Martin Skrtel hnawh chhuah a nih hnuah pawh Three Lions-in goal an khung theih miau loh avangin nuam sa takin an khel thei lo.

Hun tawp lamah erawh point hlawhchhuah tumin Slovakia-in goal venhim chu hna berah an nei a, England winger Lallana-a'n goal ban a pet per hnuah a goal khung tur chu Slovakia keeper Matus Kozacik-a'n a dan sak bakah Theo Walcott goal khung chu offside vangin pawm a ni lo.

Injury time minute li pek belh ni mah se minute 90-naa Kozacik a inhliam vangin hun pek belh a rei hret a, Tottenham left back Danny Rose thawhrah sengin Lallana-a'n hun pek belh minute nganaah a khung a, hun a tawp zui bawk. Liverpool winger Lallana hian ram tan a vawi khat nan goal a khung a, mak ang reng tak chu kum 28-a upa winger hian Slovakia an hmachhawn hma ram tan vawi 26 a khelhah goal a la khung miah lo.

England khelh dan aṭanga thlir chuan Roy Hodgson awm loh hnuah an khelh danah hmasawnna hmuh tur a la awm lo. Big Sam-a hnuaiah hian Three Lions-in inkhel thunun mah se 'killer pass' pe thei midfielder an nei lo tih a chiang a, Harry Kane lah innghahna tham a ni lo. Pep Guardiola duh loh Joe Hart-a'n hna harsa a nei lo a, chutihrualin first half-ah vawi khat ball petchhuah fuh loh a neih avangin Spanish manager duh loh chhan a hriat theih.

Rooney - 116 not out

England captain Wayne Rooney-a'n ram tan vawi 116 a khelhna chiah a ni a, goalkeeper Peter Shilton (125) chiah khelh tam lamah tluk loh a nei tawh.

Manchester United captain hian ram tan record ṭha tak nei mah se team tan a hnawksak em tih hi zawhna awm thei a ni. Rooney hnungah Eric Dier leh Jordan Henderson te an awm avangin England captain hi goal nawrna hmanrua ber tura ngaih a ni a, amaherawhchu kum 30-a upa Rooney hi striker hnung chiaha awm tur chuan a hriam tawk lo niin a lang. Chutihrualin Dele Alli luh hnuah Rooney a nung sawt a, coach thar Big Sam pawhin captain chungah rinna a nghat ngam tih a chiang bawk.

Big Sam-a thukhawchang

England manager thar Sam Allardyce chuan, "Wayne Rooney hi a duhna apiangah a khel thei a, midfield a thunun theih avangin ka tan chuan he position-a khel lo tura tih a rem lo. England player zingah ani aia langsar an awm chuang lo a, Premier League bakah Champions League-a hlawhtlinna a chan tawh avangin club anga nomawi chawi theih tur chu hmaih a nei lo. Ram tana manager anga ka tawnhriat aiin player anga ram tana a tawnhriat hi a tam zawk a, chuvangin khelmual chhunga thiam taka a tawnhriat a hman hi a ṭha a ni. Ka tan a khelhna tur sawi a ṭul hran lo," tiin team captain Rooney a dah sang hle.

Sunderland manager hlui Big Sam chuan sawi zuiin, "Ka beisei aiin Rooney-a'n tlar hnung a pui nasa ngei a, chutihrualin a khelh danah erawh ka lawm hle. Tuna ka hna tur chu goal khung turin goal khung theihna position-a hun tam zawk awm tura hrilh a ni," tiin a sawi.

Inkhel chungchang sawiin Sam Allardyce chuan, "Goal ban kan pet per a, kan goal khung dik lo takin pawm a ni lo a, goal zawnah vawi engemaw zat kan pet bawk. Adam-a'n ram tana goal hmasa ber a khung khan awm a nuam sawt a, hma kan sawn zel pawh ka beisei," tiin chak an phu thu a sawi.

Snodgrass Hattrick

Scotland-in Malta lakah Robert Snodgrass hmangin minute 9-na lekah hma hruai mah se Alfred Effiong hmangin minute li hnuah Malta in an chhang let. First half-ah goal a dang a luh belh loh hnuah Chris Martin-a'n minute 53-naah Scotland tan a khung belh hnuah Malta defender Jonathan Caruan chu sawisel kai takin hnawhchhuah a ni a, penalty a chawi bawk.

Hull City forward Snod-grass-a'n penalty hi goal-ah a chantir bakah goal dang khung belhin hattrick a siam a, Steven Fletcher-a'n Scotland goal ngana a khung bawk. Malta player Luke Gambin chu hun tawp hma hretin hnawhchhuah a ni a, 5-1 zeta chak Scotland chu Group F hmahruaitu an ni.