Germany chakna Muller

FIFA World Cup champion lai Germany-in qualifier-a an match hmasa berah Thomas Muller goal hnih leh Joshua Kimmich te goal hmangin Norway 3-0 in an sawp.

Group C inkhel dangah Azer-baijan-in minute 45-naa Ruslan Gurbanov-a goal hmangin San Marino 1-0 in an hneh a, Czech Repub-lic leh Northern Ireland te goal awm loin an inhnehtawk bawk.

Match 42!

Die Mannschaft-in World Cup qualifier-ah match 42 chhung chu hneh loh an tawng tawh lo a, hrem vanga 1950 FIFA World Cup an khelh loh hnuah football hmanga ram leh ram inelna sang berah hian an la inlan ziah.

Germany hian World Cup-ah sulhnu ṭha tak an nei a, vawi li champion tawhin hetiang zat bawk hi pahnihna leh pathumna dinhmun an hauh tawh.

Muller is back

Bayern Munich forward Tho-mas Muller-a'n European Cham-pion-ship-ah goal a la khung lo a, Euro 2016-ah striker rinrawl Mario Gomez inhliam vangin mawhphurhna sang zawk nei mah se kum 26-a upa forward hian a hna a hlen zo lo.

Germany-in inelna thlengtu France hneh loin Euro 2016 semifinal aṭangin an tla a, 2018 World Cup qualifier-ah erawh bul an ṭan ṭha hle. Keeper ṭha Manuel Neuer-a'n official-in an ram captain armband a vawi khat nan a hreng a, Bayern keeper hma hian Joshua Kimmich, Mats Hummels, Benedikt Howedes leh Jonas Hector te an ding.

Ulllevaal Stadium, Oslo-ah Germany-in inkhel an thunun a, minute 15-na lekah Thomas Muller-a'n goal hmahruai khungin first half tawp hma hretin Joshua Kimmich-a'n goal hnihna a khung. Kum 21-a upa Kimmich hian ram tana vawi sarih a inlannaah a goal hmasa ber a khung.

Inkhel ṭan aṭanga minute 60-naah Muller-a'n Germany goal thumna a khung a, Rio Olympic-a silver medalist Julian Brandt erawh Norway keeper Rune Jarstein-a'n a dan sak thung. Die Mannschaft tan midfielder beiseiawm Julian Weigl leh Max Meyer te khelmual chhungah an inlan bawk.

A harsa lo

Germany coach Joachim Low chuan, "Norway khan harsatna min siam lo a, kan duh ang thalin ball kan inpek kual bakah kan khelh dan hmang kan hloh lo. Thomas Muller-a'n hma taka goal a khung avangin inkhel a ti awlsam a, Norway-in goal khung theihna chance mumal an neih loh avangin chak kan phu an ni," tiin inkhel an thunun thu a sawi.