FIFA World Cup Qualifier Euro champion Portugal an inlan dawn

FIFA Russia World Cup 2018 khel turin UEFA-in hmun ruak 13 a nei a, Europe khawmualpui aṭanga he inelna hmachhawn pha nih tuma zanina ram langsar inlan tur zingah Euro 2016 champion Portugal an tel.

Portugal hian Ningani zan khan World Cup qualifier an khelh tur inbuatsaih nan Gibraltar chu 5-0 in an sawp a, zanin dar 12:15-ah inrintawkna nasa tak nen Switzerland an lenchilh ang.

Ronaldo tel loin

Portugal-in hliam vangin an thiampuipa Cristiano Ronaldo an la chhawr thei dawn lo a, Euro best young player Renato Sanches chu koh zingah tel mah se hliam vangin a inhnukdawk bawk .

Mahse, Portugal hi zam mai tur an ni lo. Gibraltar an hmachhawnna inkhelah Nani-a'n Ronaldo ai zo takin a awh a, captain armband hreng chungin goal hnih a khung - Valencia winger hi Switzerland tlar hnung tana ven uluk ngai tur chu a ni.

Team pahnih hi an in-ngam tawk a, vawi 10 an inhma-chhawn tawhah vawi thum ve ve hnehna changin vawi li an inhnehtawk - an inhmachhawn hnuhnung ber Euro 2008-ah Switzerland-in 2-0 in hnehna an chang a, Euro champion lai hi an hlau bik lo tawp ang.

France an tho?

Euro 2016 final-a Portugal ngam lotu France an in dawm kun rei duh lo a, an muala an tlawm hnua match an neih leh hmasak berah coach thar hnuaia khel Italy chu friendly match-ah 3-1 in an sawp - zaninah Belarus chu khualmualah an lenchilh dawn.

France coach Didier Des-champs-a'n mimal buaina avanga Euro-a a telh loh Karim Benzema a koh loh chhunzawm zel a, Real Madrid striker tel lo pawhin France an ṭha tawk - Italy lakah Anthony Martial-a'n ram tana a goal hmasa ber a khung a, Olivier Giroud-a'n kum 2016-ah ram tan match 11 khelin goal riat a khung tawh a, Antoine Griezmann an la kawl cheu bawk!

Belarus lakah erawh France hi inchhuang lutuk tur an ni bik lo - vawi li an inhmachhawn tawhah vawi hnih hnehna an chang a, vawi khat tlawmin vawi khat an inhnehtawk. Bela-rus hian an match hnuhnung pariatah vawi khat chiah tlawm hmel an hmuh avangin France tan hnehsa a ngaih chi an ni lo.

Netherlands an him lo

Football thiam ram zinga sawi hlawh ṭhin Netherlands-in Euro 2016 an khel phak lo a, manager Danny Blind-a'n Russia World Cup khelh an tumna kawngah hlawhchham an tum loh thu a sawi - mahse Netherlands hian World Cup qualifier inbuatsaih nana Greece an hmachhawn ṭumin hnehna an chang zo lo a, 2-1 in an tlawm.

Blind-a'n Greece an hneh loh zawhah zanina Sweden an hmachhawn tura hnehna chang tura an inpuahchah nghal tur thu a sawi a, Netherlands manager dinhmun chelh chhunzawm zel a duh a nih chuan a thusawi a umphak a ṭul ang.

Sweden tan captain Zlatan Ibra-himovic-a'n ram tana inkhelh a chawlhsan tawh a, Man-chester United forward tel lohna team hi tun hma ai chuan an nem deuh tura ngaih a ni. Team pahnih hi vawi 23 zet an lo inhmachhawn tawh a, Netherlands-in vawi 11 hnehna changin vawi riat an tlawm a, vawi li an inhnehtawk - inchhuang thei bik an awm lo hle.

Martinez atan insiamṭhatna

Belgium-in Euro 2016-a quarterfinal an thlen hnuah an thlen chin duhtawk loin coach Marc Wilmots an ban a, a aiawh turin beiseina sang tak nen Everton duh loh Roberto Martinez an lalut.

Spanish manager hian a match hmasa berah Kevin de Bruyne, Eden Hazard, Yannick Carrasco, Romelu Lukaku leh Michy Batshuayi te telna team hi Spain lakah 2-0 in a tlawmpui a, fan-ten kum 43-a upa manager hi nasa takin an au el.

Zaninah Martinez-a'n fan-te thinlung neih let theihna hun
ṭha a nei dawn a, khualmualah ram tenau Cyprus an lenchilh dawn. Belgium leh Cyprus hi vawi kua inhmachhawn tawhin Belgium-in vawi riat hnehna an chang a, vawi khat an inhnehtawk - zanin hi Mar-tinez-a'n insiamṭhat nan a hman loh chuan hei lo liama hun ṭha a awm tawh chuang lo.