Jeje faktu Sunil Chhetri

Inrinni zanah India-in 4-1 in Puerto Rico an sawp a, India tan tlar hmaa Sunil Chhetri leh Jeje Lalpek-hlua te inkawp fuh tak chu India chak chhanah ngaih theih niin Chhetri pawhin hei hi a hai bik lo a, Mizo tlangval Jeje khelhpui nuam a tih thu a sawi.

India tan vawi 91 inlana goal 51 khung thei striker chuan, "Jeje nena khelhdun hi nuam ka ti takzet a ni. A taksa a lian ṭha a, a chakin tharum a ngah em em a, ka khelhdan tur leh ball inpek dan tur a hrethiam em em zel a ni, " tiin Chennaiyin striker nena an inhriatthiam tawnna a sawi chhuak.

Bengaluru FC captain chuan sawi chhunzawmin, "Jeje-a hlawhtlinna hi a thawhrim vang liau liau a ni a, ram tana ṭha taka a khel zel thei hi a lawmawm takzet a ni," tiin India tana a match hnuhnung pasariha goal sarih khung thei Jeje a lawmpui thu a sawi bawk.

Bengaluru midfielder Eugeneson Lyngdoh pawhin Indian player zingah chuan Jeje hi team tan a khelh avanga khelhpui nuam a tih ber thu Aizawl a lo kal ṭumin Vanglaini palai hnenah a lo sawi tawh.