La Fabrica chhuak man a to

Real Madrid academy La Fabrica tia hriat lar aṭanga inzir chhuak footballer engemaw zatin nipui transfer bazar-ah an club an sawn a, Real academy aṭanga chhuak player-te man zat belhkhawm hi pound maktaduai 81 bawr vel a ni.

Juventus aṭanga Real Madrid lama kir leh Alvaro Morata chu manto ber a ni a, Turin khaw club aṭanga Santiago Bernabeu lama insawn striker man zat hi pound maktaduai 25.11 niin a tam tham hle. Kum 23-a upa striker hnuai chiahah Jese Rodriguez leh Marcos Alonso an awm a, Jese hian Real aṭangin PSG chu pound maktaduai 20.93-a zawmin Alonso hian hetiang zat tho hian Fiorentina
aṭangin Chelsea a zawm thung.

Russian winger Denis Cheryshev chuan Real aṭang hian Villarreal chu pound maktaduai 8.37-in a zawm a, nipui bazar-a Real academy chhuak player manto palina a ni. Pangana dinhmunah pound maktaduai hnih vela Galatasaray pantu Jose Rodriguez, paruknaah pound maktaduai khata Valencia pantu Alvaro Medran, pasarihnaah pound maktaduai pakhat vel thoa Espanyol zawmtu Jurado te an awm.

Sevilla zawmtu Pablo Sarabia leh Eintracht Frankfurt zawmtu defender Omar Mascarell te chuan pound maktaduai khat tling loin an club thar hi an zawm ve ve bawk a ni.