1978 hnua AFCON khel tur Uganda

Kum 1978 hnua a vawi khat nan Uganda chuan Africa Cup of Nations an khel dawn a, nakkuma Gabon-a neih tur inelnaa tel tur hian Pathianni khan Comoros chu 1-0 in an hneh a ni. Burkina Faso chuan 2-1 a Botswana hnehin an tling bawk.

Uganda tana goal awm-chhun hi Belgium club ṭha Standard Liege striker Farouk Miya-a'n minute 35-naa a khung a ni a, Comoros lamin an chhanlet theih loh avangin Uganda hian AFCON hi an khel dawn ta a ni. Serbian coach Milutin Sredojevic enkawlna hnuaia khel Uganda hian AFCON-a an inlan hnuhnung berah final lutin Ghana an hneh lo a, final-a an chak loh aṭanga kum 38 hnuah group stage an khel ve leh dawn ta!

14 January aṭanga 5 February inkara khelh tur AFCON-ah hian ram 16 an inel dawn a, Uganda leh Burkina Faso bakah hian Algeria, Cameroon, DR Congo, Egypt, Ghana, Guinea-Bissau, Ivory Coast, Mali, Morocco, Senegal, Tunisia, Togo leh Zimbabwe te chu AFCON khel turin an tling a, Gabon chu a thlengtu an nih avangin tling chiang sa an ni bawk.