Sunderland striker thar Anichebe

Premier League club Sunderland chuan club nei loa awm mek Victor Anichebe chu season tawp thleng an hnena khel turin contract an ziahpui. Kum 28-a upa striker hi May khan West Brom chuan an chhuah zalen a, club nei loa a awm reng hnuah Black Cats a pan ta a ni.

Sunderland boss thar David Moyes enkawlna hnuaia Everton-a season ruk chhung lo khel tawh Anichebe chuan, "Black Cats-ah hian ṭhian ṭha tak tak ka nei a, Moyes nena kan inhriat ṭhat zia chu mi zawng zawngin an hre vek. Player naupang tak ka nihlai aṭangin min kaihruai tawh a, he hmun ka rawn pan chhan pakhat pawh a ni," tiin Moyes vanga Sunderland a zawm thu a sawi.

Everton tan match 168 a inlana goal 26 khungtu striker chuan, "England mai bakah Europe hmun dang aṭangin sawmna ka hmu nual a, mah se ka ṭhat theih dan bera ka khelh chhuah leh theih beiseiin Sunderland hi ka pan ta zawk a ni," tiin a sawi bawk.