Basti enkawl danah Sami Khedira a lawm lo

Germany midfielder Sami Khedira chuan ram tana a khelpui ṭhin Bastian Schweinsteiger chuan tun aia duhsak phu a tih thu a sawi.

Juventus midfielder Khedira chuan, "Club-in chhuak tura an duh khawp chuan awm ka tum lo. Player sulhnu nei ṭha tak hian hetiang dinhmuna awm hi a phu lo a ni. Bastian hi ka player ngaihsan leh entawn a nih avangin a dinhmun ka hriat hian pawi ka ti takzet a ni," tiin a sawi. Basti hi Jose Mourinho-a'n Premier League khel thei tur zingah a hming telh mah se Europa khel tur zingah dah tel a ni lo a, thil awm dan a danglam thut a nih loh chuan Portuguese manager hnuaiah a inlan a rinawm loh hle.

United dinhmun hriatthiam-puiin Khedira chuan, "Football hi sumdawnna a ni a, hei erawh kan hriatthiam a ṭul. Football khawvelah hian zahngaihna a awm lo a, Jose Mourinho-a'n hma thlir dang a neih miau chuan pawm mai a ṭul a ni," tiin Real Madrid-a a pu hlui Jose Mourinho thutluknain awmzia a neih tho thu a sawi.