Italy-ah Nico Rosberg bawk

Pathiannia tlan zawh tak Italian Grand Prix-ah Nico Rosberg chuan hnehna a chang. Mercedes driver hi tun hnai intlansiak hnuhnung pahnihah pakhatna a ni a, a teammate Lewis Hamilton chu pahnihna a ni ve ve bawk.

Champion lai Hamilton-a'n pole position aṭangin bul ṭan mah se kawng kawi hmasa berah a chet fuh loh avangin paruknaah a tla hniam a, a tawp thlengin Rosberg hi a chhaih buai tawh meuh lo. World champion vawi li ni tawh Sebastian Vettel chu pathumnaah thlengin pakhatna a phak lohna hi second 5.9 a ni.

Kum 31-a upa Rosberg hi Italy bikah hian a vawi khat chakna a ni a, tun season-ah ṭum sarih hnehna a channa chiah niin Formula 1 inelna bikah chuan vawi 21 hnehna a channa chiah a ni bawk.

Rosberg chuan, "Italy-ah hnehna ka chang ve ta! Ka tan a hlu a, hnuhma thar ka hnutchhiah nia min entu leh min ṭantu zawng zawngte chungah lawmthu ka sawi," tiin a sawi.

Tun season tawp ruala For-mula 1 inelna chawlh san tur Felipe Massa chu Italian Grand Prix-ah hian pakhuana a ni a, Force India driver Sergio Perez (8) leh Nico Hulkenberg (10) te point an hlawh chhuak ve leh bawk.

Kumin intansiak vawi 14 an neih tawh aṭangin Hamilton-a'n point 250 hmuin driver championship-ah hma a la hruai chhunzawm zel a, pahnihna Rosberg nen an inthlahna chu point hnih chauh a nih tawh avangin intlansiak pakhat lekah hmahruaitu hi inthlak thei an ni tawh. Tun season-ah inelna pasarih an la hmabak a, September 18 khian Singapore Grand Prix an tlan leh ang.