Mends-a goal hmangin Aizawl FC-in semifinal an lut
Durand Cup-ah Aizawl FC-in nimin khan Bright Middleton Mends-a goal hmangin Army Red 1-0 in an hneh a, Asia rama football inelna upa berah MPL champion-in semifinal an lut.
Aizawl FC hian point kua hmuin September 8 hian group match hnuhnung berah Real Kashmir FC khelh tur an la nei a, anmahni hnaihtu pahnih Neroca (8 Pts) leh Army Red (5 Pts) te an la inhmachhawn avangin Mizo club hian a chhe berah pahnihna dinhmun an hauh chiang tawh.
Ricky a kir
AFC-in Neroca an hneh loh ṭuma hrem vanga inlan lo Ricky Lallawmawma chu Army Red hmachhawn turin an chhawr leh thei tawh a, MPL champion-in tlar hnunga Mizo defender ṭha rual MFA Super Cup best defender Ricky, Lalramchullova, Lalruatthara leh Lalrinzuala Khiangte-te an rem thei a, goalkeeper chu Lalawmpuia a ni.
Mizo club-in Neroca lakah goal chhuah mah se an ṭhat ber dana tlar hnung an rem theih hnuah goal an chhuah tawh lo. Mizo pali Francis Zonuntluanga, Zothanpuia, C. Lallianmawia leh Lalramniengmawia te awmna Army Red-in AFC tlar hnung an su hawng zo lo.
A hunah Mends
Ghanaian forward Bright Middleton Mends chu Lammuala goal a khung theih tawk loh vangin sawisel a hlawh a, amaherawhchu AFC foreign striker hi I Day Football final-a goal pawimawh khungtu tih theihngilh loh a ṭha a, MFA Super Cup-a Bungkawn FC lama goal khung an harsat laia goal hmanga team chhandamtu tih hriat tel a ṭha bawk.
Durand Cup-ah Bright-a'n Aizawl FC-in hmalam êng zawk an neih theih nan kawng a sial a, Dempo SC an hneh ṭumin goal hnih a khung bakah Indian Air Force an hneh ṭumin goal awm chhun a khung. Nimin tlaia Aizawl FC chakna kawngah pawh Mends bawk hi danglamna thlentu a ni a, minute 51-naah goal awm chhun a khung.
Chak duh team
Tun season-a Aizawl FC kalkawng en hian, chak duhna thinlung an put hi an chakna chhan a ni. Independence Day Football leh MFA Super Cup-ah chak lo tura ngaih an nih hnuah vawi hnih an 'comeback' tawh a, harsa takin an chak leh hram ṭhin.
Durand Cup-ah pawh Neroca FC lamak chak lo mah se, 1-0 a ṭum hnih an chak thei hian an fighting spirit ṭhatzia a nemnghet. An tlar hnung hi an kim ṭhat chuan an khawng takzet a, tun season chu an goal khung lam aiin an goal chhuah tlem hi an hlawhtlinpui zawk niin a lang - an chakna ber erawh an 'huaisenna' a ni.
Intluktawk
Aizawl FC technical director Hming-than-sanga chuan, "First half-ah an khel-
ṭha zawk a, second half-ah erawh kan chungnung zawk. Kan khelh apiang kan tum tawk zel a, semifinal kan thleng hi kan lawm hle a ni. Group match hnuhnung ber kan khelh tukah semifinal kan khelh nghal dawn avangin player pawimawh kan awltir thei dawn a, hei hian final kalkawngah min puih ngei ka beisei," tiin Vanglaini palai a hrilh.