City-ah Yaya Toure a cham zel dawn

Manchester City manager Pep Guardiola-a'n Champions League squad-ah Yaya Toure a telh lo a, Ivory Coast midfielder agent Dimitri Seluk chuan a pla-yer chuan Etihad Stadium a chhuah-san chuan loh tur thu a sawi.

Dimitri Seluk chuan, "Pep-a thutlukna a nih avangin kan zah tur a ni. Pep hian tun season-ah Champions League no-mawi a chawi a nih chuan England-ah kalin TV-ah Guardiola hi manager ṭha ber a nih thu ka sawi ang. Mahse, Pep hian Champions League nomawi a chawi lo a nih chuan player ropui Yaya te ang a enkawl danah hian tihsual lian tak a neih thu huaisen taka sawi turin ka phut ve thung a ni," a ti.

Toure agent chuan sawi chhunzawmin, "Pep hian League Cup-a third division club an hma-chhawn huna minute 10 vel lek khel tura ṭha tawkah Yaya hi a ngai a ni mahna. Ka sawi theih chiang tak erawh Yaya hi City-ah a cham zel ang a, January-ah pawh a chhuak lo ang. A thiamna pholang tura hun ṭha pek a nih a inbeisei mek a ni," tiin a player chungchang a sawi.

City hian Inrinni hian Old Trafford-ah an hmelma Man-chester United an luhchilh dawn a, striker rinrawl Sergio Aguero chu hrem vangin an chhawr thei dawn lo. Spanish manager Pep-a'n Argentine striker thlak nan tu nge a hman dawn tih hriat a la ni lo a, Nigerian forward Kelechi Iheanacho chu inkhel bul ṭan tura ngaih a ni. Chutihrualin Guardiola hian Spanish left winger Nolito pawh false nine-in a chhawr lo ang tih a sawi thei lo a, Raheem Sterling bakah Leroy Sane te'n Aguero ai an awh thut thei bawk.

United lam pawh hliam vangin an buai a, Luke Shaw leh Henrikh Mkhitaryan te pawh qualifier khel tura koh ni mah se hliam vangin besei aia hmain Old Trafford-ah an let a, South American pathum Antonio Valencia, Marcos Rojo leh Sergio Romero te erawh Zirtawpniah an kir hman chauh ang. Shaw leh Mkhitaryan te bakah hian Marouane Fellaini leh Jesse Lingard te chu hliam vangin City hmachhawn turin an dinhmun a la chiang lo.