Nadal-a US Open a tawp

Rafael Nadal chu US Open 2016 last 16 aṭangin a tla. Pathianni zan khan Nadal hi Lucas Pouille lakah 6-1, 2-6, 6-4, 3-6, 7-6 (8-6) in a chak lo.

Spain tlangval hi kum 2013 US Open tiltle a lak hnuah hard court-ah bik vawi khat (Doha 2014) chiah a la champion leh a - kum hnih zet chu a hlawhtling ta rih lo!

Last 16 inkhel dangah nimin zing khan world number 1 Novak Djokovic chuan Kyle Edmund a hneh a, Inrinni zan khan Jo-Wilfried Tsonga leh Gael Monfils te pawhin quar-terfinal an lo lut tawh bawk.

Nadal a tla!

Arthur Ashe Stadium-a inkhelah Nadal-a'n bul a ṭan
ṭha tawk lo a, set hmasa berah game khat chiah a la. Set hnih ve ve an lak hnuah chak zawk ti chiang turin tie break khelh a ni a, hetah pawh hian Nadal hi dinhmun ṭha lo zawkah ṭang chhunzawmin 4-1 in a hniam. Spanish star hian chak lo mai tum loin tie break hial thlen pui leh mah se darkar li chhung an inkhelh hnuah set hnuhnung ber 7-6 (8-6) a hlohin a chak lo.

Seeded palina Nadal hi Grand Slam inelna bikah kum 2004 hnua season khat chhunga major tournament paliah quarterfinal a luh miah loh ṭum khatna a ni a, tun ṭuma a hneh loh hi seeded 24-na a nih avangin a tan mualphona a tling.

Kum 30-a upa Nadal hi a khel chhe lo a, a ṭha thawkhat. Mahse, tunhma lama Nadal kan hmuh ang kha a ni tawh lo, a service (Ace 1) a nat tawk loh bakah unforced errors (41) a ngah. A vanglaia midang tih theih loh a tih ṭhinna a thahruai leh chet ranna te kha a tlahniam ta tih a hmuh theih.

Hetihlai hian kum 22-a upa Pouille a fakawm. A forehand a nat tluk zetin backhand pawh a na thawkhat a, inkhel chhung zawngin a tlan tamin Nadal-a'n a nawr buai karah pawh a dingnghet thei a, quarterfinal luh a phu.

Eng nge an sawi?

Grand Slam vawi 14 cham-pion tawh Nadal chuan, "Set hmasa berah 6-1 in ka chak lo a, zero aṭanga bul ka ṭan lo kha thil ṭha a ni. Vawiina ka beih let dan kha a ṭha ka ti a, ka rilru put hmang leh huaisenna khan min ti lawm. Ka khel chhe lo a, duhthusam erawh a ni lo - Pouille khan hnehna chan phu khawpin a khel ṭha a ni," a ti. Nadal hian a service a ṭhat tawk loh thu leh a kum tam ve deuh tawh mah se tennis khawvelah hmabak a la neih thu a sawi tel bawk.

World number 25 Pouille chuan, "Hetiang anga result
ṭha hi chu ka ngaihtuah phak lo thil a ni a, ka tan chuan vawiin kan inkhela thil thleng zawng zawng kha a hlu vek," tiin ten-nis a khelh hnua a result neih ropui ber chungchang a sawi. France tlangval hian quarterfinal-ah Gael Monfils a hmachhawn leh ang.

Novak nge nge

Seeded pakhatna Djokovic-a'n inkhelh hah vak ngai loin second round leh third round a paltlang a, last 16-ah pawh harsatna a la tawk chuang lo. Arthur Ashe Stadium-ah world number 84 Edmund chu darkar khat leh minute 55 chhungin 6-2, 6-1, 6-4 in a sawp. Kum 29-a upa Djokovic hi set thum naah a ban na vangin enkawl lailawk a ngai a, harsatna lian erawh a thlen zui lem lo.

Grand Slam nomawi 13-na beisei mektu Djokovic chuan, "Inkhel tura kan nghah rei a ngaih avang khan a bulṭan chhoh kha a awlsam lutuk lo a, set hnuhnung lamah erawh ka khelh dan pangngain ka khel chhuak thei," tiin Nadal te inkhel rei vanga darkar hnih vel ngawta an inkhelh hun a tlai phah chungchang a sawi lang.

Serbian thiampuipa hi Edmund lakah hian a khel ṭha hle a, a service vawi hnih hloh ve mah se a khingpui service hi ṭum riat ngawt a chhuhsak. Djokovic hian quarterfinal-ah Jo-Wilfried Tsonga a hma-chhawn leh dawn a ni.

Inkhel dang

Last 16 inkhel dangah seeded pakuana Jo-Wilfried Tsonga chuan kumin US Open khelh meka khawtual tlangval dam la awm chhun Jack Sock chu 6-3, 6-3, 6-7(7), 6-2 in a hneh. France tlangval hian set thumnaah match point a hmuh chu Sock hian a pawttla a - set linaah erawh Tsonga hian a khingpui service hi vawi hnih chhuhsakin a chak chiang hle.

Kum 30-a upa Gael Monfils chuan 2006 Australian Open finalist Marcos Baghdatis lakah 6-3, 6-2, 6-3 a hnehna changin Flushing Meadows-a a vawi thum nan quarterfinal a inhlangkai.