Costa-a'n Spain tan goal a khung Ventura hnuaiah Italy-in hnehnain bul ṭan

Spain-in coach thar Julen Lopetegui hnuaia compe-ti-tive match hmasa berah Liech-tenstein chu 8-0 zetin an sawp a, ram tana goal khung harsat vanga an sawisel ṭhin Diego Costa-a'n goal hnih a khung.

2018 FIFA World Cup Qualifier Group G inkhel dangah La Roja ang bawka coach thar nei Italy-in khualmualah Israel 3-1 an hneh a, Antonio Conte thlaktu Giampiero Ventura bul ṭan dan a zahpuiawm loh hle.

Albania leh FYR Macedonia te inkhel erawh goal khat ve ve an khung hnuah ruahsur vangin minute 76-naah inkhel tihtawp a ni a, nimin tlai khan inkhelh hmabak minute 14 hi khelh chhunzawm a ni.

Spain tan Brazilian

FIFA World Cup 2014 atan inelna thlengtu Brazil leh Spain-in Atletico Madrid striker Diego Costa an inchuh a, duh thlang thei val Costa-a'n a pianna ram leh vawi hnih lai a khelh sak tawh Brazil phatsanin a club khelhna Spain tana khel turin thutlukna a siam.

Goal khung theih vanga lar Costa-a'n Atletico tan match 135 khelhah goal 64 khung mah se Spain tan erawh goal khung a harsat a, FIFA World Cup-ah goal a khung lo. Hei chauh hi a ni lo, Brazilian forward hian Euro 2016 qualifier-a Luxembourg lama a khung bak Spain tan goal a khung lo a, inelna tak takah koh a ni lo zui bawk. Match 11 chhunga goal khat lek khung thei striker an sawisel hi a mak lo!

Euro 2016-a mualpho Spain team-in harhna an mamawh a, thla thum liam ta maia an hnawl hnu Costa chu mamawh chhanna a ni a. Kum 27-a upa Chelsea forward hian Spain mipui beiseina chu kum hnih hnuah a tihlawhtling. Costa hian minute 10-na lekah Liechten-stein lamah goal hmahruai a khung a, minute 66-naah goal hnihna a khung leh bawk

La Roja tan hian David Silva leh substitute Alvaro Morata ten goal hnih ve ve an khung bakah Sergi Roberto leh Vitolo ten goal khat ve ve an khung bawk.

Chelsea striker Diego Costa chuan, "Goal ka khung theih miau loh avangin kan tan chuan ram tana khelh a harsa a, tunah erawh game-ah ka inrawlh tam avangin goal ka khung ngei ka ring. Goal khung theih loh vanga ka buai chhung hian ka teammate chungah ka vui ngai lo a, beidawng lo tura min fuihtute an nih avangin an chungah ka lawm zawk. Awmze neia sawisel hi chu a dik lohna a awm lo a, Spain player-te chungah chuan beiseina a sang a ni," tiin goal khung vang a lawm thu a sawi.

Lopetegui thukhawchang

Spain boss Julen Lopetegui chuan, "Kan team khelh dan leh point thum avangin ka lawm. Bul ṭan ṭhat hi a pawimawh a, second half kan khelh dan phei kha chu duhthusam a ni. Kan khelh dan thlirin beiseina leh tumruhna kan nei a, hmabak kan nei êng hlein ka hria," tiin an khelh dana a lungawi thu a sawi.

Hei le Italy chu

Euro 2016 kha kum 50 chhunga Italy chhiat ber ṭum tihin an sawisel a, Antonio Conte hnuaiah quarterfinal hial an thleng avangin a thlaktu nih a huphurhawm hle.

Amaherawhchu kum upat ngaihtuaha tawnhriat la ngah lo Giampiero Ventura-a'n pressure nasa tak hnuaiah Italy mipui beiseina a siam a, Israel an hneh dan aṭang ringawta thutlukna siam erawh a la fuh lo thung.

Italy-in inkhelh ṭantirh lamah Giorgio Chiellini chet-sual vangin buai deuh mah se Azzurri-in an goal nawr hmasak berah goal an khung nghal. Inhliam vanga Euro 2016 khel thei lo Marco Verratti ball fing chu Graziano Pelle-a'n minute 14-naah goal khung nan a hmang. Italian striker Pelle hian Southampton chhuahsanin China lam pan mah se Italy goal hnuhnung pasarih zinga goal li hi a khung a la ni tlat.

Minute 31-naah Milan mid-fielder Giacomo Bonaventura penalty hlawhchhuah chu Antonio Candreva-a'n khung mah se minute li hnuah Maccabi Tel Aviv winger Tal Ben Haim-a'n mawi takin Italy keeper Gigi Buffon a pet khum. Israel tana goal khungtu hi Bolton Wanderers leh Chelsea vela khel ṭhin defender kha a ni lo.

Second half ṭan aṭanga minute kuana lekah Chiellini hnawhchhuah a ni a, Juventus defender chetfuh loh zan a ni ber. Player 10-a khel chungin Italy an talbuai a, substitute Ciro Immobile-a'n chhanhimin Lazio forward hian minute 83-naah goal pawimawh khungin Azzurri hi hmun himah a dah.

Ventura thukhawchang

Kum 68-a upa Giampiero Ventura chuan, "Qualifier-a player 10-a khelh hi a harsa a, chutichung chuan kan huaisenna lantirin point thum kan hlawh chhuak thei a ni. Kan goal chhuah dan kha France nen friendly match kan khelh ṭuma kan goal chhuah dan nen a inan em avangin kan khelh dan kha duhthusam ka ti lo. Team angin kan khel chho ang a, kan chak loh pawhin team angin kan tuar ang a, kan chak pawhin team angin kan lawm ang," tiin hmasawnna tur an la ngah thu a sawi.

October 6-ah World Cup qualifier hi khelh a ni leh dawn a, Italy-in Spain an hmachhawn nghal dawn avangin ngaihven a hlawh ang.