Kosovo-in point an hlawh chhuak

May thla khan Kosova chu FIFA member atan lakluh an ni a, 2018 World Cup qualifier an khelh hmasak berah Finland nen 1-1 in an inhnehtawk. Group I inkhel dang Croa-tia leh Turkey bakah Uk-raine leh Iceland te pawh 1-1 thoin an ṭin bawk.

Kosovo chu

Kum 2008 khan Ser-bia aṭangin Kosova hi an indang a, kumin May thlaa FIFA member-a lawmluh an nih chauh avangin an player engemaw zat hi ram dang tan an lo khel hman tawh.

Thawhṭanni zana goal pawimawh khungtu Valon Berisha pawh hi inkhelh hma darkar tlemteah chauh khelh phalsak a ni. Finland-in minute 18-naah Paulus Arajuuri hmangin hma anhruai a, Kosovo-in minute 60-naa Berisha penalty hmangin an sut.

Red Bull Salzburg midfielder Berisha hi Sweden-ah a piang a, a nu leh pa te hi Kosovan niin Norway-a seilian a nih avangin ram tan (Norway) pawh vawi 18 zet a inlan tawh. Berisha ang tho hian inkhelh ṭan hmain Albania tana inlan tawh Amir Rrahmani, Alban Meha, Herolind Shala, Milot Rashica leh Samir Ujkani te chu FIFA-in Kosovo tan khelh a phalsak.

Tun hnai thla liam ta pawh khan Kosovan player pakua zet chu an ram khelhna thlak an dil anga pawmsak an ni a, heng player-te hian European ram paruk tan an khel tawh a, chung ram zingah chuan Germany leh Switzerland te pawh an tel. Hei vang hian Kosovo hi FIFA hnuaia hun rei la awm lo mah se en kan mai chi an ni lo.

Kosovo-ah hian Pre-mier League-a hming langsar Xherdan Shaqiri, Granit Xhaka leh Adnan Januzaj te hian duh se chuan khel thei an ni.

Entu awm lohna

Croatia an hrem avang--in Maksimir Sta-dium-ah entu an awm lo a, minute 44-naah captain thar Luka Modric-a penalty hlawhchhuah chu Ivan Rakitic-a'n khung mah se Turkey-in Hakan Calhanoglu hmangin an sut a, goal dang a luh belh lo.

Olympic Stadium-a Ukraine leh Iceland in-khelah pawh entu an awm bik lo. Euro 2016 an khelh ṭhat vanga sawi zui hlawh Iceland-in Dutch league Eredivisie-a top scorer pawh lo ni tawh Alfred Finnbogason hmangin minute ngana lekah goal an khung a, hun tawpah erawh a vannei zawkah an ṭang.

Ukraine-in first half tawp hmain Andriy Yarmolenko hmangin an sut a, minute sarih ciah a awm tawh tihin Yevhen Konoplyanka-a'n penalty a hlah avangin 1-1 in an inhnehtawk.