US Open Murray kaltluang dang thei an awm lo
US Upen 2016 khelh mekah Andy Murray a khel ṭha tluang takzet a, last 16-ah seeded 22-na Grigor Dimitrov lakah game nga chiah hlohin nuamsa takin nimin zing khan quarterfinal a lut.
Flushing Meadows, New York-a inkhelah seeded pahnihna Murray hian Bulgarian Dimitrov hi darkar hnih chhungin 6-1, 6-2, 6-2 in a hneh. Britain fachuam hian kumin US Open-ah hian match li a khelh aṭangin set khat chiah a la hloh a ni.
Olympic vawi hnih champion tawh Murray hian Dimitrov lakah hian 141mph zeta na in vawi khat chu a service a, hei hi tennis a khelh hun chhunga a service nat ber ṭum a ni! Dimitrov nen an inhmachhawn ṭum hian a service hmasa ber hi 53% dikin a tlangpui thuin 140 vel a ni thei a, a vaw na takzet.
Kum 29-a upa Murray hian semifinal lut tur chuan seeded parukna Kei Nishikori a paltlang leh a ngai dawn. Japan tlangval hian quarterfinal lut tur hian Croatian tlangval service na tak Ivo Karlovic chu 6-3, 6-4, 7-6 (7-4) in a lo hneh ve bawk.
Murray chuan, "Vawiin chu ka khel ṭha hle a ni, ka service kha ka beisei aiin a ṭha a, ka vannei tel bawk. Vawi 23 chauh unforced errors ka neih bawk avangin Grigor tan chuan a harsa ve hle ang," tiin a khelh danah a lawm hle.
World number 2 Murray leh quarterfinal-a a hmachhawn tur Nishikori hi tun hmain vawi riat intum tawhin Japan tlangval hi vawi khat chiah a chak zawkah a la ṭang. Rio Olympic mipa singles semifinal kha an intawn hnuhnung niin Murray-a'n straight set in hnehna a chang.
Del Potro vs Stan
Inkhel dangah Juan Martin del Potro leh Stan Wawrinka ten an khingpui ve ve an hneh a, anni pahnih hi semifinal luh inchuhin an inhmachhawn zui leh nghal ang.
2009 champion Del Potro hian last 16-ah Dominic Thiem a hmachhawn a, Rio Olympic silver medalist Del Potro hian 6-3, 3-2 a hma a hruai laiin a khingpui Austrian star hi a khup na vangin a inkhel chhunzawm thei lo.
Mipui ṭan hlawh Del Potro chuan, "Tuna ka awmna hi Argentina aṭangin hla hle mah se ka tan chuan mahni ina awm ang ka ni. New York mipuite nen hian inpawhna kan nei ṭha em em a ni," a ti.
Inkhel dangah Grand Slam vawi hnih champion tawh Wawrinka pawhin harsa lutuk loin Illya Marchenko chu 6-4, 6-1, 6-7 (5-7), 6-3 in a hneh ve bawk. Swiss tlangval hian tun hnaiah a zawnin kum li chhung chu US Open-ah hian quarterfinal a lut ta.
Semifinal-a inhmachhawn tur Del Potro leh Wawrinka te hi tun hmain vawi ruk an lo inhmachhawn tawh a, Argentina star Del Potro hi record nei ṭha zawk niin vawi li a chak tawh. Hetihlai hian Wawrinka hian Grand Slam qarterfinal a khelh hnuhnung 12-ah vawi khat chiah chak loh a neih avangin an in-ngam tawk hle tura ngaih a ni.