Bale-a hoin Wales an chak nuamsa

Euro 2016 semifinalist Wales-in an chet ṭhat an chhawm nung zel a, Thawhṭanni zan khan World Cup qualifying inkhelah Moldova chu Gareth Bale-a goal hnih khung chhawr ṭangkaiin 4-0 in an sawp.

Group D inkhel dangah Serbia leh Republic of Ireland chu goal hnih ve ve khungin an inhnehtawk a, Austria chuan khualmualah Georgia chu 2-1 in an hneh bawk.

Euro-a beisei phak lo Austria tan hian Martin Hinteregger leh Marc Janko te chuan goal khat ve ve khungin Georgia tana Spartak Moscow midfielder Jano Ananidze goal khungin awmzia a nei thui lo.

Wales nge nge

Euro 2016 semifinal an thlen hnu lawkah Wales manager Chris Coleman-a'n an chet
ṭhat chu Russia-ah chhunzawm an duh thu a sawi a, Coleman-a sawi ang ngeiin World Cup qualifier-ah bul an ṭan.

Minute 38-naah Gareth Bale-a ball cross mawi tak chu Sam Vokes-a'n a tauh lut a, minute li liam hnuah Joe Allen half-volley mawi tak hmangin an goal hnihna a khung ve leh a, Wales tana a goal hmasa ber a ni.

Chawlhlawk hman a nih hnuah Bale bawk a langsar a, Real Madrid forward hian Moldova defender Ion Jardan ball pass sual nangchingin Wales goal thumna a khung a, injury time-ah penalty hmangin an goal lina a khung bawk.

Rush hnaihtu Bale

Gareth Bale-a'n Wales tan goal hnih a khung a, ram tan goal 24 a khung tling ta chiah. Bale hian ram tana goal khung hnem pahnihna dinhmun a luah nghal a, khung hnem ber ni turin vawi 73 inlana goal 28 khungtu Liverpool striker ropui ṭhin Ian Rush chiah a phak tawh lo.

Real Madrid forward hian goal 24 khung tur hian match 62 inlan a mamawh a, kum 27 chauha upa a la nih avangin Rush-a record hi a khum ngei a rinawm hle. Southampton-a a professional career ṭantu Bale hian kum 2006 khan Wales tan a match hmasa ber khelin kum 16 leh ni 315 a upa a ni a, a hunlaia Wales tana inlan thei naupang ber a ni.

Bale hian a career ṭantirah left back-ah a khelh ṭhin avangin ram tana a inlan hmasak match 27-ah goal thum chiah a khung. Tottenham-ah hmun pawimawh changa tlar hma lam a chan hnuah Bale-a'n goal khung a uar
ṭan a, kum 2016-ah ram tan match riat khelin goal nga a khung tawh a, nikum khan vawi ruk inlanah goal nga a khung bawk!

Coleman a lawm

Wales manager Chris Cole--man chuan, "World Cup qualifier-a kan match hmasa bera hnehna kan chang nghal thei hi team tan a ṭha a, point thum chauh ni mah se a hmasa ber a nih miau avangin a hlu bik a ni. Game harsa tak kan khel dawn tih kan hria a, mah se kan theihna zawng zawng pea kan khelh avangin result duhawm tak kan hlawh chhuak a ni," a ti.

Team pahnih hi Cardiff City Stadium-ah an inhmachhawn a, inkhelh chhung zawngin mipui pungkhawm 31,731 ten Wales team an au phur. Coleman chuan, "Fan-te bawk kan tan an hlu a, an ṭawiawmna ropui tak avangin result duhawm tak kan nei thei a ni. Fan-te thawm a ṭhat avangin player te pawn khelh nuam an ti a, goal tam zawk khung thei dinhmunah kan ding hial a ni," tiin a lawm hle.

Irish ropui lo!

Serbia khelmualah Republic of Ireland an lenglut a, hma taka goal hmahruai an khung hnuah an chungnunna an chhawr ṭang-kai thei lo a, 2-2 in an inhnehtawk hram. Mikhual team tan hian Burnley player manto ber Jeff Hendrick chuan minute 3-na lekah goal hmahruai a khung a, a bak zawng erawh Serbia chan a ni.

Serbia tlar hmaten vawi tam Ireland tlar hnung an rum ṭhaih hnuah Filip Kostic-a'n mualneitu team tan an si phurh sutna goal a khung a, Dusan Tadic chuan penalty sawisel hlawh tak hmangin an goal hmahruaina a khung bawk.

Serbia-in inkhel an thunun avangin chak mai tur angin an lang hman a, mah se minute 81-naah Daryl Murphy chuan ngaihdan dang neiin Rep Ireland tana a goal hmasa ber a khung a, a team tan point khat hlu tak a hlawh chhuak - kum 33-a upa Newcastle United striker hian ram tana a goal hmasa ber khung tur hian match 24-a mamawh!