Pulis-a'n Baggies chhuahsan dawn lo

West Brom boss Tony Pulis chu nipui transfer bazar-ah a player duh ang club neituten an lakluh sak theih loh avangin a bang dawn nia sawi ni mah se Welsh manager hian Hawthorns chhuahsan tumna a nei lo tih tihchian a ni.

Baggies hian nipui transfer bazar-ah club player manto ber ni turin pound maktaduai 13 man midfielder Nacer Chadli an lakluh bakah QPR winger Matt Phillips, Watford full-back Allan Nyom, Everton full-back Brendan Galloway leh free agent striker Hal Robson-Kanu te an lalut a, Pulis-a'n rei tak chhung a lo hel tawh pound maktaduai 20 man Sporting Lisbon midfielder William Carvalho an lalut thei lo thung.

West Brom chairman John Williams chuan, "Tony-a'n player panga lakluh a duh thu a sawi a, a duh ang ngeiin player panga pek a ni. Tony hian player pangate hi uluk takin a en thlithlai a, a hrechiang em em a ni," tiin an manager chu a player duh tak an pek thu a sawi a, Carvalho an lalut thei lo erawh pawi a tih thu a pha bik lo.

Inrinni khan West Brom hian Indian Super League club Delhi Dynamos chu friendly match khelhpuiin 1-0 in hnehna an chang a, Pulis-a'n a naute hi a ho loh avangin a chhuak dawn nia tarlan hman a ni. Mahse, Stoke City leh Crystal Palace manager hlui hian Premier League an khelh leh hmasak bera an hmachhawn tur Bournemouth inkhel a en avangin Delhi hi lo mikhual lo zawk a ni tih tun hnaiah sawi a ni.

Hawthorns-a West Brom leh Delhi inkhelah hian Mizo tlangval Lalchhawnkima pawhin Baggies hi a hmachhawn a, season hmasaa Aizawl FC tana a khelhpui Manipuri keeper Soram Poirei pawhin Baggies hi a hmachhawn ve bawk.

Baggies player manto ber Nacer Chadli chuan West Brom tana a match hmasa ber khelin Delhi hi a hmachhawn a, Baggies-a trial nei mek Liverpool midfielder hlui Mohamed Sissoko leh Arsenal striker hlui Maruane Chamakh te pawhin Delhi hi an hmachhawn a ni.

Tute nge inlan?

Albion: Myhill (Palmer 72), Dawson (McCourt 83), Nyom (Harper 62), Olsson (Sweeney 72), Wilson, Phillips (Bradley 76), Yacob (Fitzwater 72), Sissoko (Forss 72), Gardner (R Nabi 83), Chadli (Melbourne 62), Chamakh (Smith 26, Wilding 89).

Delhi: Doblas (Soram 45, Ghosh 84), Chakrabarti, Edathodika (Lalchhawnkima 27), Rocha (Devadas 62), Addy, Nongrum, Tebar, Ongnam, Malouda (S Nabi 72), Marcelinho, Lewis.