Ter Stegen-a tan contract thar

La Liga champion Barcelona president Josep Maria Bartomeu chuan, an goalkeeper Marc-Andre ter Stegen chu a contract pawhsei sak tuma hmalakna an kalpui mek thu a sawi a, German keeper hian kum thum chhung cham turin contract a la nei mek.

Barcelona hian thla tharah Lionel Messi, Luis Suarez leh Ivan Rakitic te chu contract thar zawrha Nou Camp-ah rei zawk chamtir zel an tum thu an lo puang tawh a, Ter Stegen-a hming lamrik a ni ve leh ta.

Bartomeu chuan, "Barcelona-in hmalam kan pan zelna kawngah Ter-Stegen hi a pawimawh em em a, a hmalam hun lo awm zel tur pawh kan hnenah hmang zel se kan duh a ni. Rakitic, Suarez leh Messi te an pawimawh tluk zetin Ter Stegen pawh a pawimawh a, amahah hian thui tak kan innghat a ni," a ti.

Kum 24-a upa keeper hian 2014 khan Borussia Monchengladbach chhuah-sanin Nou Camp hi a zawm a, Claudio Bravo a awm ve avangin La Liga aiin Champions League-ah chhawr hnem zawk a ni. Nipui transfer-ah khan Champions League chauh a duhtawk loh avangin chhuak tur anga sawi a ni hman a, mah se Bravo zawk hian Manchester City a zawm hnuah Nou Camp-ah hian a cham chhunzawm zel dawn niin a lang.