Grand Slam-a chak hnem ber Serena Williams
Serena Williams chuan Yaros-lava Shvedo-va hnehin Thawh-
ṭanni zan khan US Open 2016 quarterfinal a lut. American star hi Grand Slam inelna bikah match 308 a chakna chiah niin khawvelah ani aia major tournament a hnehna chang tam an awm tawh lo a ni.
Arthur Ashe Stadium-a in-khelah world number 1 Serena hian darkar khat leh minute riat chhung chauhin Kazakhstan nula Shvedova hi 6-2, 6-3 in a hneh.
Serena hian a thahruai ngah chhawr ṭangkai lehin 126 mph zeta nain a service a, hei hi tun tournament a hmeichhe service na ber a ni. Vawi 11 aces a siam bakah hian a khingpui service hi vawi thum chhuhsakin a service a hum vek thung a, a khel ṭha takzet.
Kum 34-a upa Serena hian third round-a Sweden nula Johanna Larsson a hneh khan hmeichhe tennis player zinga hnehna chang hnem ber Martina Navratilova-i record match 306 chu lo khum tawhin Roger Federer-a record (307) a lo tluk chiah tawh - tunah chuan Swiss thiampuipa record pawh a rawn khum leh ta.
Federer leh Serena te hi mipa leh hmeichhia an nih avangin khaikhin chi an ni lo ang. Mahse, khawvela tennis player piang tawh zinga ropui berte an nih miau avangin sawi dun erawh a ṭul.
Grand Slam vawi 17 cham-pion tawh Federer hi August thla khan kum 35 a tling tawh a, hetihlai hian major title 22 zet la tawh Serena hi September 26 hian kum 35 a tling ve chiah bawk ang.
Serena chuan, "Number tam tak a ni ta! Hetiang zat hnehna ka chang thei hian tennis ka khelh hun chhung rei zia leh ṭha taka ka khelh tluan rei zia a ti lang chiang hle a - ka chhuang hle," tiin a record thar siam chungchang a sawi.
Zawhna chhangin Serena chuan, "Federer pawhin hnehna a chan chhunzawm zel ka ring a, kei pawhin ka record siamsa hi ka belhchhah zel theih ka beisei. Eng nge lo thleng zel tur chu ka hre chho zel ang, inkhelh chhunzawm zel turin ruahmanna ka nei," tiin a sawi.
Grand Slam biakah Serena hian match 308 hnehna changin vawi 42 a chak lo zawkah a ṭang - US Open (88), Wimbledon (86), Australian Open (74), French Open (60) te hi a sulhnu neih niin a thlen chin apaing hi record thar a ni chho zel tawh a, nakin thlenga sawi zui hlawh tawh tur a ni.
Inkhel dang
Seeded pangana Simona Halep chuan Spain nula Carla Suarez Navarro chu 6-2, 7-5 a hnehin last 16 a paltlang a, quarterfinal-ah Serena nen an inhmachhawn leh ang.
Romanian star chuan quarter-final thlir nghalin, "Serena hi khawvela a ṭha ber a nih zia chu inhrilh nawn a ngai lo. Ka tan hlauhthawn tur a awm lo a, rilru tih hrehawm hun pawh a ni lo. Ani ka hmachhawn tur hi ka tan chuan chona hautak leh phurawm tak a ni," tiin a sawi.
Last 16 inkhel dangah Venus Williams chu seeded 10-na Karolina Pliskova lakah 4-6, 6-4, 7-6 (7-3) in a chak lo a, semifinal-ah Williams unau inhmachhawn kan hmu thei dawn ta lo tihna a ni. Kum 24-a upa Pliskova hian a vawi khat nan Grand Slam inelnaah quarterfinal a lut a, Ana Konjuh a hmachhawn leh dawn a ni.
Croatian rawlthar Konjuh hian seeded palina Agnieszka Radwanska chu 6-4, 6-4 a a hneh theih avangin Pliskova nena semifinal luh an inchuh tur hi a hmuhnawm ang.