Sania Mirza ten quarterfinal lut

India tennis star Sania Mirza chu mixed doubles-ah tla tawh mah se hmeichhe doubles-ah an la chak tluang zel a, Thawhṭanni zan khan Mirza leh a ṭanpui Barbora Strycova te hian American-Japanese pair Nicole Gibbs leh Nao Hibino te hnehin US Open quarterfinal an inhlangkai.

Indo-Czech pair hian set khat naah an service ṭum hnih hloh chungin 6-4 in set an la thei tho a, set hnuhnung zawkah pawh 7-5 in a chungnung zawkah an ṭang a, hnehna chang tur hian darkar khat leh minute 17 an mamawh.

India star dang Rohan Bopanna leh a ṭanpui Gabriela Dabrowski te erawhin Mirza te angin result duhawm an nei thei lo. Mixed doubles quarterfinal-ah Bopanna te hi Robert Farah leh Anna-Lena Groenefeld te ṭangdun lakah minute 58 chhung lekin 6-1, 2-6, 8-10 in an chak lo a ni.