Simeone vangin ka cham - Griezmann

France forward Antoine Griezmann chuan manager Diego Simeone-a'n Atletico Madrid a chhuahsan a nih ngawt loh chuan La Liga club aṭanga hmun dang pan a tum lem loh thu a sawi.

Euro 2016 top scorer hian Real Sociedad aṭanga Atletico a zawm hnuah season hnih chhungin inelna hrang hrangah goal 50 chuang a khung der tawh a, tun din-hmunah Europe-a forward hriam berte zinga mi a ni.

Kum 46-a upa Simeone kaihhruaina hnuaiah Atletico hian Europa League, King's Cup leh La Liga nomawi an chawi tawh a, Argentine coach hian tun hnai kum thum chhungin a club hi Champions League final ṭum hnih a hruai thleng bawk.

Griezmann chuan, "Con-tract ka ziah hma khan Simeone ka bia a, ani chuan Atletico-a a cham chhunzawm tur thu min hrilh avangin kei pawhin hun rei zawk cham ka tum. Ani hnen aṭang hian thil ka zir hnem em em a, tun dinhmunah chuan Spain-ah hian ka hlim avangin club dang ka ngaihtuah rih lo," tiin a sawi. Club lian dang tam tak chil ti puttu forward hian June thla khan kum 2021 thleng cham chhunzawm turin contract a lo ziak tawh a ni.

Season hmasa La Liga pa-thuma Atletico hian kumin-ah bul an ṭan fuh tawk lo a, an match hmasa pahnihah kaithar Alaves leh Leganes te inhnehtawkpuiin point hnih chiah an la hmu - Inrinni zan hian Celta Vigo an hmachhawn leh ang.