US Open Djokovic leh Monfils an tlang

US Open 2016 khelh mekah Nilaini khan Novak Djokovic chuan Jo-Wilfried Tsonga hnehin quarterfinal a lut. Inkhel dangah Gael Monfils chuan Lucas Pouille a hneh ve bawk. Anni pahnih hi Zirtawpni khian semifinal-ah an intawng chhunzawm leh ang.

Flushing Meadows, New York-a inkhelah world number 1 Djokovic hian French tlang-val Tsonga hi darkar khat leh minute 20 chhungin 6-3, 6-2 in a hneh. Seeded pakuana Tsonga hi a khup na vangin set hnihna an khelh hnu hian a inhnukdawk.

Serbian thiampuipa Djoko-vic hian US Open-ah hian a zawnin kum 10 zet chu semi-final a lut ta, he inelna hmuna record nei ṭha ber a zawna kum 12 chhung semifinal lut thei American legend Jimmy Connors chiah tluk loh a nei ta. Wimbledon third round-ah chak loin Rio Olympic-a a match hmasa berah tla nghal mah se Djokovic a tho leh mek.

Kum 29-a upa Djokovic hi kumin US Open-ah hian a vannei - second round-a a khingpui tur Jiri Vesely chu hliam vangin a inhnukdawk a, third round-a Mikhail Youzhny laka set khatnaa 4-2 a hma a hruai laiin a khingpui hi inhliam vangin a inkhel chhunzawm thei lo - match nga a khelh tawh aṭangin vawi hnih chiah a khingpuite an la khel tluan thei.

Monfils a tlo

Seeded 10-na Gael Monfils hi US Open-ah hian a khel ṭha tluang hle a, semifinal lut tur hian set a la hloh miah lo! Arthur Ashe Stadium-ah French tlangval hian quarterfinal-ah a hnampui Lucas Pouille chu darkar hnih chhungin 6-4, 6-3, 6-3 in a hneh.

Kar hmasa lawka kum 30 tling hlim Monfils hi tun hnaiah hard court bikah chuan record nei ṭha berte zinga mi a ni a, Wimbledon hnuah match 21 a khelh aṭangin vawi 19 ngawt hnehna a chang thei - a zawnin a khingpuite lakah set 15 zet chu a la zawn tawh a ni.

Monfils hian tun hnaiah Wa-shington-ah ATP World Tour title a la tawh a, Monte-Carlo leh Rot-terdam-ah te final a lut bawk.

Semifinal an thlir

Semifinal-a inhma-chhawn tur Djokovic leh Monfils te hian sulhnu an inneih ṭhat hleih hle, tun hma lama vawi 12 an intawn tawh naah Djokovic hian hnehna a la chang fai vek. Hetihlai hian Monfils hi a chet ṭhat vanglai a ni ve miau a, tun hma lama an sulhnu ang ngawt chu a ni tawh bik lo mai thei.

Djokovic chuan semifinal thlirin, "Gael hi ka hmuh dan chuan kuminah hian a bik takin hard court-ah a khelh ṭhat vanglai a tawn chhoh mek avangin inkhel hautak a ni dawn," tiin a sawi.

A vawi hnih nana Grand Slam semifinal khel tur Monfils chuan, "Novak hi khawvela ṭha ber a ni mek a, kei aiin a ṭha zawk tih hi ka tan sawi zahthlak a ni lo. Mahse, hnehna chang turin vawi khat khelh ṭhat a tawk... ka zam bik lo," tiin a sawi. Monfils hi 2008-a French Open semifinal a khelh hnuah ṭun tum hi major tournament-a a thlen san leh ber ṭum a ni.

Nizan khan seeded pahnihna Andy Murray leh Kei Nishikori te an inhmachhawn a, mipa quarterfinal hnuhnung ber atan tukin zing khan Juan Martin del Potro leh Stan Wawrinka te an inhmachhawn bawk.

Hmeichhe lam

Hmeichhe lamah world number 2 Angelique Kerber leh Caroline Wozniacki te chu US Open 2016 semifinal-a inhmachawn turin Nilaini khan quarterfinal an paltlang.

Kerber hian 2015 finalist Roberta Vinci chu 7-5, 6-0 in a hneh a, German nula hian WTA ranking-a number 1 nilai Serena Williams dinhmun luahlan turin kawng dik a zawh zel. Kum 28-a upa Kerber hian final a lut a nih chuan Serena tan world number 1 nih chhunzawm tur chuan a champion ngei ngei a ngai dawn a ni.

Quarterfinal inkhel dangah Woznia-cki chuan Anastasija Sevastova chu 6-0, 6-2 a hnehin US Open-ah hian a vawi nga nan semifinal a lut.

Nizan khan hmeichhe singles quar-terfinal hi khelh chhunzawm niin Ana Konjuh leh Karo-lina Pliskova te an inhmachhawn a, tukin khan Serena leh Simona Halep te an inkhel bawk.