AFC tan draw a tawk

Tukin zing dar 8:30 hian Aizawl FC-in Real Kashmir FC an hmachhawn dawn a, Mizo club hian point khat tal an hlawh chhuak a nih chuan semifinal-ah Group A hmahruaitu DSK Shivajians an pumpelh ang.

Nimin khan Manipur club Neroca FC-in an elpui Army Red nen 2-2 a inhnehtawkin semifinal an lut a, Mizo club point hmuh zat point kua tho an hmu. Aizawl FC-in table mawngphaha awm Real Kashmir laka point khat an hmuh pawhin group stage-a an hneh loh Neroca chungah an awm dawn a ni.

Aizawl FC technical director Hmingthansanga chuan, "Inrinni hian semifinal kan khelh nghal dawn avangin kan player-te kan hahdamtir a ṭul dawn," a ti.

MPL champion hian point an hmuh hrim hrim chuan semifinal-ah Army Green an hmachhawn ang. Nimin tlai inkhelah Army Green hian Gangtok Himalayan 1-0 in an hneh a, point kua hmuin Sporting Goa (7 Pts) chungah an awm.