World Cup qualifier Euro champion Portugal an tlawm nghal

Cristiano Ronaldo tel loa World Cup qualifier-a an match hmasa ber kheltu Portugal-in beisei an phak lo a, Euro 2016 champion hi Switzerland khelmualah 2-0 in an tlawm.

Switzerland tan Breel Em--bolo chuan inkhelh ṭan aṭanga minute 23-na lekah goal hmahruai a khung nghal a, Bayer Leverkusen forward Admir Mehmedi chuan minute sarih hnuah rawn chhunzawm ve leh nghalin Portugal an hawihai hle.

Chawlhlawk hman a nih hnuah Portugal-in thawhleh tum viau mah se goal an chhuah hma tuarin an sut thei tawh lo a, 2-0 in a tlawm zawkah an ṭan a ṭul ta a ni. Arsenal midfielder Granit Xhaka chu injury time-ah a yellow card pahnihna a hmuh avangin hnawhchhuah a ni.

Portugal coach Fernando Santos chuan, "Inkhel ṭantir lam minute 15 vel kha chu kan khel ṭha em em a, a pawi ber erawh kan daih rei lo lutuk kha a ni. ," tiin a sawi.

Belgium an harh

Everton manager hlui Ro-ber--to Martinez-a'n Belgium a enkawl hmasak berah Spain a hmachhawn a, 2-0 a a tlawm zawk-ah an ṭan avangin fan-ten nasa takin Spanish manager hi an au el. Thawhlehni zana a competitive match hmasa ber-ah erawh Martinez-a'n a naute hneh-na a chanpui nghal a, khual-mualah Cyprus chu 3-0 in an sawp.

Belgium tan Everton lama Martinez-a hman thiam tawh sa Romelu Lukaku a hmuhnawm a, kum 23-a upa striker hian goal hnih a khung. Atletico Madrid winger Yannick Carrasco chuan hun tawp dawnah goal khat khung ve bawkin substitute Michy Batshuayi chuan penalty goal-ah a chantir thei lo thung.

Goal khung lo France

Euro 2016 final-a tlawm France-in an rilru natna te theihnghilh tumin Belarus an hmachhawn a, friendly match-a 3-1 a Italy hneh thei team hian goal an khung theih miau loh avangin team pahnih hi goal khung loin an inhnehtawk.

Netherlands an la harh lo

Euro 2016 khel phak lo Netherlands-in harhna an la chang thei chuang lo. Sweden nen goal khat ve ve khungin an inhnehtawk a, Panathinaikos striker Marcus Berg-a'n Sweden tan goal hmahruai a khung hnuah Wesley Sneijder chuan Netherlands si phurh sutna goal a khung a, coach Danny Blind-a mualpho lutuk tur a chhanhim.

Referee thutlukna pakhat vangin Netherlands-in chak result an hlawh chhuak zo lo a, coach Danny Blind a lungawi lo hle. Kum 55-a upa manager chuan, "Referee khan inkhel a enkawlṭha hlein ka hria a, mah se hun tawp dawna kan goal khung a pawm lo erawh a tisual lian hle a ni. Zaninah hian point hnih chhuhsak kan ni," tiin a lungawi lo hle.

Macedonia ngamtu Albania

Thawhṭanni zan khan Alba-nia chuan Macedonia mikhualin minute 75 thleng khelh hman a ni a, ruahpui vanawn a sur avangin khelh chhunzawm theih a ni lo. Inkhel tihtawp a nih lai hian team pahnih hi 1-1 in an inhnehtawk a, Armando Sadiku-a goal hmahruai khung chu Macedonia tan Ezgjan Alioski-a'n a sut.

Inkhel tihtawp a nih hnuah pawh ruahsurin ziaawm lam a pan thei lo a, darkar 15 zet an chawlh hnuah Thawhlehni tlai khan an khelh chhunzawm leh chauh! Inkhelh nawn a nih leh hnuah Albania tan Bekim Balaj chuan minute 89-naah an chakna goal khungin mikhual team hian hnehna an chang ta a ni.