Goal khung thei Rashford
England manager Sam Allardyce-a'n FIFA World Cup qualifier khel turin Marcus Rashford a ko lo a, Manchester United forward hi Under 21 tan inlanin Norway U21 lamah hattrick siamin Gareth Southgate hote 6-1 in an chak.
2017 UEFA European U21 C'ship Group 9-ah England hi vawi ruk khelhah point 14 hmuin hmahruaitu an ni a, match khata khel tam Switzerland-in point 12 hmuin an dawt a, Norway (10 Pts) chu pathumna an ni. England khelh hmabakah hian beisei tur nei tawh lo Kazakhstan leh Bosnia and Herzegovina te chiah an awm tawh.
Kum 18-a upa Rashford hian a tlan chakna hmangin minute 29-naah goal hmahruai a khung a, minute 65-naah goal ropui khung lehin minute 71-naah a penalty hlawhchhuah chu hattrick siam nan a hmang. England U21 tan hian Nathaniel Chalobah, Ruben Loftus-Cheek leh Lewis Baker te'n goal khat ṭheuh an khung.
England boss Big Sam-a'n mahni club tana khelhna hmun chang tam lo a koh loh avangin senior team-ah Rashford-a tan hmun a awm lo. United rawlthar hian Jose Mourinho hnuaiah Premier League-ah minute 19 chiah la khelin Hull City lamah chakna goal a khung.
Dutch manager Louis van Gaal-a'n khelhna hmun a pek avangin khawvel hriata inlar Rashford hian United tana Europa League leh Premier League a khelhna hmasak berah goal a khung a, England senior team tana a inlan hmasak berah goal khungin Under 21 tana a khelhna hmasak berah hattrick a siam bawk.
United rawlthar Rashford hi nakkuma neih tur Under-20 World Cup, South Korea leh European Under-21 Championships, Poland ah a la tel thei ve ve a. Amaherawhchu Colchester Community Stadium-ah England manager Sam Allardyce chu Rashford-a hattrick siam lai entu zingah a tel a, kum naupang zawk inelnaah hian a tel zel ang em tih hi zawhna awm thei chu a ni.
Rashford-a tan kum chinchhiahtlak
25 Feb United tana a khelhna hmasa berah Midtjylland lamah goal hnih a khung. (Europa League)
28 Feb Premier League a khelh hmasak ber ṭumin Arsenal 3-2 in a hneh a, goal hnih a khung
21 May FA Cup final-ah United tan bul ṭanin Crystal Palace 2-1 in an hneh
27 May England tana a inlanna hmasa berah Australia lamah minute thumna lekah a pet goal. (Friendly match)
6 Sep England U21 tana a inlan hmasak berah Norway lamah hattrick a siam