Dinthar FC-in Chanmari FC an cho
I Day Football leh MFA Super Cup-ah Chanmari FC-in nomawi an chawi lo a, Aizawl FC elpha tur chuan Mizoram Premier League nomawi an chawi a ṭul ang. Coach Lalsangzuala Hmar tan MPL5 match hmasa bera Malsawmfela tel loa Dinthar FC hmachhawn a awlsam dawn lo.
Hetihlai hian Dinthar FC coach Lalrintluanga (Saitea) chuan, "Ka tan chuan Chanmari hi mihring tak pawhin ka hnuhma enin an zuamawm ka ti," tiin Vanglaini a hrilh mauh mai.
Vawiin tlai dar 2:30 hian Chan-mari FC leh Dinthar FC te Lammmualah an inkhel dawn. Aizawl FC-in Durand Cup an khelh avanga an inkhelh hun sawn a nih avangin Chanmari FC tan vawiin hi MPL5-a an match hmasa ber tur a ni.
Dinthar FC erawhin MPL kaithar Ramhlun North hneh loin bul an ṭan a, point an hmuh vat loh chuan an hmalam a êng lo hle.
Saitea hnuhma chu
MPL ṭan kum khan Luangmual FC coach Vanlalrova chu chhung-kaw dam lohna vangin Kolkata-ah a zin a ṭul a, hei vang hian assistant coach Saitea chu team kaihruaitu a ni. MPL ṭan tirha Chanmari FC enkawltu coach hi tun season ṭantirha Dinthar FC coach Lalchhuanawma a ni thung a, assistant coach chu tun
ṭuma Chanmari boss Lalsangzuala Hmar a ni.
Luangmual FC leh Chanmari FC te hi 1-1 in an inhnehtawk a, hun kal tawh thlir letin Dinthar FC coach Saitea chuan, "MPL hmasa bera Chanmari kan hmachhawn ṭum khan kawng engkimah kan chungnung a, penalty kan chawi vang chauhin 1-1 in kan inhnehtawk. Chanmari tan hian tuna an player pawimawh midfielder MS-a pawh hi a khel a, ka tan chuan Chanmari hi mihring tak pawhin ka hnuhma enin an zuamawm ka ti," tiin an khingpui tur chu a hlau lo hle.
Chanmari 9-3 Dinthar
Dinthar FC coach Saitea chuan sawi chhunzawmin, "Club pahnih inkar boruak ka hria a, kan club hotute leh veng chhung mipuite pawhin Chanmari FC hneh loh chu an duh lo ang. Ka tan chuan inkhel phurawm tak a ni a, result ṭha kan neih theih hi ka beisei a ni," a ti.
Chanmari FC leh Dinthar FC inkar boruak a sang ṭhin a, MPL tinungtu leh tingaihnawmtu an ni. Kum li chhungin vawi 13 an inhmachhawn tawh a, vawi kua chak tawh Chanmari FC record a ṭha zawk a, Dinthar FC hi vawi thum an chak ve tawh. 2015 I Day Football group stage-a an intawng ṭum chiah khan an inhnehtawk a, vawiin pawh hian point khat ve ve insem loin club pakhat zawkin point thum an hmuh ngei a rinawm.
April 25, 2014-a an intawn
ṭum kha MPL history-a inkhel chhin-chhiahtlak a ni. MPL2 final lut chiang tawh Chanmari FC-in final-ah Dinthar FC an hmachhawn duh lo a. League match hnuhnung bera goal kua zet luhna inkhelah Chanmari 5-4 in an chak a, Dinthar final kalkawng an hnawh phui sak. Hei inkhel hi MPL bika intih elna atana 'Bye Bye' an hman
ṭan ṭum a ni a, Chanmari ṭantuten Dinthar an 'Bye Bye' chiah kha chu Lammuala neutral supporter pawhin Maimawms tana a nat dan tur a hriatthiampui khawp ang.
November 5, 2015 kha club pahnih intawn hnuhnung ber a ni a, Ramengmawia goal hnih hmangin Chanmari FC 2-1 in an chak.
Hemi ṭum hian Chanmari supporter-te'n referee thutluknaa an lungawi loh vangin Lammual a inkhel en loin an veng kawnah Big Screen-in an en a, thutlukna fuh niin a lang lo. He mi hnu hian Chanmari FC-in MPL-ah Lammualah a hma angin ṭantu an nei ṭha leh tawh lo - an result-in a tuar zui. Insiamṭhat an duh a nih chuan vawiin
aṭanga an ṭan a ṭul ang.
Hliam leh hrem
Dinthar winger Lalruatpuia (hrem) leh midfielder R. Lallawm-kima (damlo) te an inlan thei dawn lo a, Chanmari lamin MFA Super Cup final-a inhliam forward Malsawmfela leh midfielder Lalrin-chhana te an la chhawr thei dawn bik lo.
Hei chauh hi a ni lo, MFA Super Cup best keeper Lalmuanawma a mit an zai avangin a khel dawn lo a, for-ward Lalruatfela Zote leh winger Lal-muan-zova-te pawh an dam sam loh avangin an dinhmun a chiang lo bawk.
Chanmari FC manager Mawitea chuan, "Sawmfela, Rinchhana leh Muanawma-te hi chu squad-ah an awm lo chiang. Player 20 ziah luh zel a ṭul avangin Fela Zote leh Muanzova te pawh kan squad-ah kan dah ang a, kan chhawr theih kher pawh ka ring lo," tiin Vanglaini palai a hrilh.
Chanmari manager thusawi hi a dik a nih chuan inkhelh ṭan hmaa chungnung zawk tih theih tur an awm dawn lo.
Coach Sanga hian nikum khan Bethlehem Vengthlang FC enkawlin season ṭantirh lama player inhliam vanga buaina hi an lo nei tawh bawk. Player inhliam hi team tan a pawi a, MFA Super Cup-a best forward Sawmfela inhliam a pawi lehzual ang. Midfielder Rinchhana thlakna turah zawhna a awm nghal a, Reuben Zosangpuia leh Rochhingpuia te en kân an nih leh chuan tawnhriat nei ṭha midfielder-ten an football career chhem nung turin club dang an zawn a ṭul dawn a ni.
Engtin zel?
Dinthar FC hian tlar hmaah Samuel Laltlanthanga leh Michael Lalremruata te an nei a, tlar hnung-ah Vanlalchhanhima leh Lalrem-tluanga-te an neih avangin Chanmari FC laka point thum hmu turin an ṭha tawk. Sihphir rawlthar R. Lalnumawia hi MPL5-a hming chher thei tur zinga ngaih ni mah se game hmasa berah a khel fuh lo.
Chanmari FC manager thusawi hi a dik a nih ngai chuan MFA Super Cup leh I Day Football-a inlan tawh team kha an ni dawn lo - a chhiat erawh an chhe lo. Dinthar FC-in attacking football an khelh ngam phawt chuan inkhel a hmuhnawm khawp ang.