Zaninah Zo United Vs Chhinga Veng
Chhinga Veng FC mipuiin Lammuala 'Chhinga Veng - nuam nuam nuam' an tih rual ṭhup ṭhup aṭanga ni ruknaah Zo United an hmachhawn dawn a, Chhingcows-in Lammual an mawi zo ang em, tih chu zanin dar 7:00 hian a hriat theih ang.
MPL kaithar hian I Day Football leh MFA Super Cup-a hneh an neih loh hnuah MPL5-a an match hmasa berah Chanmari West FC chu Lalkhawpuimawia goal hmangin 2-0 in an hneh a, Zo United erawh Bethlehem Vengthlang FC lakah goal khatin an vanduai thung.
An dam tawh
Inhliam vanga buai Chhinga Veng an dam chho ṭan a, Lalram-felpuia a dam tawh avangin Chan-mari West an hneh ṭumin tlar hnung a phui sawt a, loan hmanga lakluh Dinthangpuia a ṭangkai bawk.
Heitihlai hian player langsar ber ang hiala chhal theih MS Dawngliana'n training a zawm tawh a, MPL5-a la inlan lo Dawngtea hi a khelh theih phawt chuan Chhinga Veng goal nawr a na sawt ang.
MPL1 top scorer leh MPL2 best forward Dawngtea a awm ta lo a nih pawhin Chhinga Veng tana harhna thlentu Kelkang tlangval Mapuia an kawl avangin Zo United tlar hnung tan buaina tham a ni ang.
Valrina a lo kir?
Champhai midfielder Chhan-rin-pianga'n a club hlui Zo Uni-ted training a zawm tawh a, Bethlehem Vengthlang midfielder hlui hi he thu ziah lai hi chuan Champhai lam aṭanga NOC a la thlen loh vangin MFA registration committee hnuaiah ziah luh a la ni lo. Chutihrualin zaninah erawh Valrina hian Zo United kawr a hak hman ngei beisei a ni a, Vanlalrova hote goal nawr a na sawt ang.
Zo United tana thu lawmawm chu match hmasa bera an chhawr theih lo defender Dominic Lal-ruat-fela leh Lalṭhazuala (Puitea) te an dam tawh a, MPL-a an match hmasa ber aiin an ṭha tawh zawk tih a chiang hle.
Inngam tawk
Zo United coach Vanlalrova chuan, "Kan theihna anga kan khelh chhuah theih chuan kan
ṭha zawkah ka la ngai a, kan chak ngei pawh ka ring," tiin chak a inrin thu Vanglaini palai a hrilh.
Rova hian an match hmasa bera an chak loh chhanah player-te'n an khingpui an dahhniam vang a nih thu a sawi a, Chhinga Veng lakah chuan an tlukna ngaia tlu tawh lo tura ngaih an ni.
Chhinga Veng coach Lalrem-tluanga chuan, "MPL ṭan hma kha chuan inhliam kan ngah a ni satliah lo a, training-naa kan chhawr char char kha inkhelh niah an khelh theih loh thute kan hre chauh a, insiamṭhat a harsa a ni. Tunah erawh thil kalphung a dang tawh a, MPL-ah Chhinga Veng ṭha zawk kan lantir thei ang," tiin result ṭha an chhawm nun zel a beisei thu a sawi.