US Open Andy Murray leh Del Potro an tla

US Open 2016 aṭangin Andy Murray chu Kei Nishi-kori hneh loin Nilaini zan khan quarterfinal-ah a tla a, nimin zing khan Juan Martin Del Potro pawh Stan Wawrinka lakah a tlawm bawk.

Flushing Meadows-a in-khelah seeded pahnihna Murray hi darkar thum leh minute 57 chhungin Asian tlangval lakah hian 1-6, 6-4, 4-6, 6-1, 7-5 in a chak lo. Japanese Nishikori hian Murray nen an intawn vawi kua aṭangin tun ṭum hi vawi hnih hnehna a chan vena chiah a ni.

Kum 29-a upa Murray hian kuminah Australian Open leh French Open final-ah world number 1 Novak Djokovic hneh loin Wimbledon leh Rio Olympic-ah a champion thung a, tun season atana inelna lian hnuhnung ber US Open-ah erawh a hmawr bawktuah a
ṭang thei ta lo.

Seeded parukna Nishikori chuan, "Court chhungah khan nuam ka ti lutuk a, awmdan thiam a har, ka inthunun thei hram. Bul ṭan fuh lo zawk mah ila a tawp ka khar ṭha thung," tiin Murray a hneh chu nuam a tih thu a sawi. Nishikori hian New York-ah hian kum 2014 khan final lo khel tawhin Marin Cilic lakah a chak lo a ni.

Mipa singles quarterfinal inkhel hnuhnung berah 2009 champion Del Potro-a'n inkhel bul ṭan ṭhain Wawrinka lakah set hmasa berah game hmasa pahnih la mah se 7-6, 4-6, 6-3, 6-2 in a chak lo zawkah a ṭang. Swiss star Wawrinka leh Nishikori te hi semifinal-ah an inhmachhawn zui ve leh thung ang.

Argentina star Del Potro hi a ban rek vawi thum ngawt zai a ngaih avangin a zawnin Grand Slam pakuaah ngawt a inlan thei lo a, ATP ranking-ah 142-na a nih vangin seeded a ni phak lo a, tun ṭumah hian Wildcard pek niin ṭha taka khel chhoin final lut thei mai tura ngaih ni mah se 2014 Australian Open leh 2015 French Open champion lakah a ding zo lo a, a beiseina a tawp zui bawk.

Grand Slam vawi hnih champion tawh Wawrinka chuan, "Court chhunga ka awm chhung khan taksa chauh pawh ni loin rilru a hah takzet," tiin awlsam taka hnehna a chan mai bik loh thu a sawi.