Bayern hmachhawn tur Schalke

Zanin dar 12:00 hian Bayern Munich chuan tun season-a an league match hnihna an khel dawn a, Schalke 04 khel turin Veltins-Arena an pan ang.

Bundesliga champion Bayern Munich hian an nomawi humhim turin an match hmasa berah season hmasa 13-na Werder Bremen chu 6-0 in an sawp nghal a, striker Robert Lewandowski chuan goal thum a khung. Poland captain hian season hmasa khan league match 32 a khelh aṭanga goal 30 a lo khung tawh bawk avangin Schalke tlarhnung tan ani ven hi hnapui bera neih a ngai ang.

Hetihlai hian season hmasa pangana Schalke erawhin season bul an ṭan fuh lo a, player 10 a khel tluan Eintracht Frankfurt lakah 1-0 in an tlawm. Markus Weinzierl-a nauten minute 90 chhungin anmahni aia team nem zawk laka goal an khung loh avangin Bayern laka goal khung tur chuan insiam thar an ngai hle ang tih a chiang.

Bayern boruak a ṭha

Pep Guardiola thlaktu Carlo Ancelotti kaihhruaina hnuaiah Bayern-in an ze ngai chhuah chhunzawmin result ṭha an nei zel a, hei bakah hian senior player Franck Ribery leh Xabi Alonso te chuan Allianz Arena boruak a nawm thu an sawi chhuak.

Kum 33-a upa Ribery chuan, "He hmunah hian kum hnih dang chu ka la cham chhunzawm ka ring," tin tun season tawp ruala a contract tawp tawh tur chu a pawhsei ngei a beisei thu a sawi.

Bayern-in Werder Bremen an sawp ṭum khan an senior player-te an khel ṭha hle a, midfielder Xabi Alonso leh defender Philipp Lahm leh winger Franck Ribery ten goal an khung nghe nghe. Anni pathum hi international match khel hah tawh lo an nih avangin zanin pawh hian rinrawl an ni leh ngeiin a rinawm.

Heng bakah hian Italian manager tan rawlthar duhawm Renato Sanches chu khelmual chhunga lut tura thlan theih a ni tawh ang. Euro 2016-a Portugal champion puitu Sanches hian tun nipui lai khan German champion hi zawmin hliam vangin a la inlan lo thung.

Spain international hlui Alonso chuan a teammate chungchang sawiin, "Sanches hi a kum la naupan ngaihtuahin thahrui a ngah a, kan hnenah kar hnih chhung
ṭha takin training a nei tawh a, a theihna san zia ka hria - nomawi min chawipui thei tur khawpa player ṭha a ni," tiin a sawi.