Nistelrooy anga hlawhtlin tum Janssen

Tottenham Hotspur striker thar Vincent Janssen chuan amah ang thoa Dutch player Ruud van Nistelrooy hlawhtlinna ang kha Premier League-ah neih ve theih a inbeisei thu a sawi chhuak.

Manchester United legend Nistel-rooy hian United tan league match 150 a khelh aṭangin goal 95 a khung a, Premier League, FA Cup leh League Cup-ah te a champion a ni.

Nistelrooy nena khaw khat chhuak tlangval chuan, "Nistelrooy nen kan pianna khua a in ang a, chuvang mai chuan min khaikhin ang tih ka hlau hle. Khaikhin tlak khawpa ka khelh chhuah hun a la awm ngei ka beisei a, tun dinhmunah erawh kan la inthlau em em a ni," tiin Dutch legend chu a dah sang hle.

Season hman zawh taka Dutch league-a goal 27 khunga top scorer dinhmun luahtu chuan, "Ka theihna tak tak phochhuah duh hian ka tuihal reng ṭhin a, chu chu ka talent neih len ber a ni hial mai thei. Player zawng zawng ten hmasawn kan duh a, White Hart Lane hi nuam ka ti nghal hle a ni," tiin Spurs a zawm chu ti fuh a intih thu a sawi.