Mikhual Pakistan-in England ngam

ODI series match nga an khelha 4-1 a an tlawm hnuin Pakistan chuan an mualpho zualpui khuh nan T20 match-ah England an sawp ve thung a, Nilaini zan khan Old Trafford-ah mual-neitu team hi wicket kuain an hneh.

Bat hmasa zawk England hian over 20-ah run 135 siamin mi pasarih an hloh a, run siam hnem ber Alex Hales chuan ball 26-a hmachhawnah run 37 a siam thei hram. Pakistan bowler zingah Wahab Riaz chu England batsman te ngam loh ber a ni a, kum 31-a upa fast bowler hian over li a vawmah run 18 chiah pein wicket thum a la thei a ni.

Pakistan hian over 14.5 lekah an target umphain run 139 an siam a, mi pakhat chiah an hloh! Mikhual team tan ball 36-a hmachhawna run 59 siamtu Sharjeel Khan a out hnuah pawh a dinpui Khalid Latif chuan a tawp thleng damin run 59 tho a vaw chhuak a, awlsam takin Pakistan hi hnehna a chanpui.