Aston Villa tan Jack Grealish a rinawm

Aston Villa rawlthar duhawm Jack Grealish chuan Championship club-ah hian season li dang hun hman chhunzawm turin contract a ziak a, kum 20-a upa midfielder hian kum 2020 nipui thleng Villa tan a khel ang.

Kum 2014 tawp lama Villa tana a match hmasa ber kheltu Grealish chuan, "Mi zawng zawngin he club ka hmangaihzia chu an hria a ni. He hmuna football khelh chhunzawm zel hi ka duh a, ka in tia Villa Park koh theih ringawt pawh hi ka tan chuan thil lawmawm a ni. Premier League-ah kir leh ngei kan tum a, kan tum a hlawhtlinna tura tha thawhtu nih ka duh a ni," tiin contract thar a ziah chhan a sawi.

Hetihlai hian Villa hian kum 18 chhung an club academy-a thawk tawh an midfielder hlui Gordon Cowans chu an chhuahtir. Kum 57-a upa Villa legend hian player a nih laiin Villa hi league nomawi a chawipui bakah European Cup-ah hial a champion pui a, vawi 528-a inlanah goal 42 a khung sak a ni.