Durand Cup semifinal Aizawl FC khingpui tur Army Green

Mizo club Aizawl FC-in group hmahruaitu ni chungin Asia ram football inelna upa ber Durand Cup semifinal an thleng a, zanin dar 7:00 hian Ambedkar Stadium-ah PC Lallawmkima captain-na hnuaia khel Army Green an hmachhawn ang.

MPL champion hi tun season-ah I Day Football leh MFA Super Cup an champion tawh a, hemi hma hian India rama football inelna ngaihhlut Federation Cup final an thleng tawh bawk.

Vawiin tlai dar 5:00 hian Mizo panga awmna DSK Shivajians leh Mizo pakhat awmna Neroca FC ten semifinal an khel dawn bawk a, final khel tur hriat hma hauhin Mizo tlangvalin Durand Cup nomawi an chawi dawn tih a chiang tawh!

Hmahruaitu AFC

Aizawl FC-in Group A hma-hruai-tu ni turin nimin zing khan Harbaksh Stadium-ah Real Kashmir FC chu 1-1 in an inhnehtawkpui a, AFC tan William Lalnunfela'n minute rukna lekah a khung.

MPL champion hian goal nga khung tawh Ghanaian forward Bright Middleton Mends leh player pawimawh eng emaw zat an hamdamtir a, inkhel thunun chungin goal an khung thei lo.

AFC technical director Hmingthansanga chuan, "Team tin hi kan intluk tawk vek a, vanneih leh vanduai inkar a ni ber. Semifinal-a Army Green hmachhawn turin kan dam kim a, final thlen ngei tumin theihtawp kan chhuah ang," tiin Mizo hming tihṭhat zel an tum thu a sawi.

Samthang tlangval

Army team-ah hian Green aiin Red an ṭha zawka ngaih a ni. Durand Cup semifinal la thleng ngai lo Army Green chenna ngai loh rama hruai thlengtu hi Samthang tlangval PC Lallawmkima a ni.

Army Green captain LK-a hian group match hnuhnung bera Gangtok Himalayan hneh turin goal awm chhun a khung a; semifinal lut tura an elpui dang Sporting Goa 2-1 a an hneh ṭumin goal hnih a khung bawk.

Durand Cup khelh meka hming langsar ber zinga mi LK-a hi tualchhung football-ah hriat a la ni lo a, hming chher tur pawhin Lammuala a la luh loh bakah Aizawl khelmualah ball a la pet lo!

Durand Cup-a goal nga khung tawhtu striker LK-a chuan, "Sports quota-a sipai zawm ka ni lo a, sipai intlar dan pangngai aṭanga lut ka ni. Ka vanneih zarah tun dinhmun hi ka thleng chho a, Durand Cup khelh hma hian inelna tenau deuhah Army Green tan ka captain a, tun hi ka vawi hnih armband hrenna a ni," tiin hnuhma ṭha a neih ngsi oh thu a sawi.

Samthang tlangval chuan, "Pa ka nei tawh lo a, ka nu (Thanpuii Sailo) in bang loin ka tan min ṭawngṭai sak ṭhin vanga tun dinhmun thleng thei ka ni. Army Green-in a vawi khatna atana Durand Cup semifinal kan thleng thei hi kan lawm em em a, Aizawl FC kan hmachhawn hunah pawh kan tih dan
ṭhin pangngaiin theihtawp kan chhuah ang," a ti.

Lianmawia thlirna

Services-in 2013 Santosh Trophy an champion ṭuma top scorer Farkawn tlangval Army Red-a khel C. Lallianmawia chuan, "Aizawl FC khel a mawi berin ka hria. Amaherawhchu ni sa hnuaiah chuan Aizawl FC hi an chau hma deuh a, chu ti chung chuan champion tur chuan an rinawm ber. Army Green ṭhatna chu an fitness a ni a, DSK Shivajians hian ka beisei an pha lo deuh. Neroca FC kan draw vangin kan tla a, Manipur club pawh an chhe lo," tiin MPL champion a dan san ber thu a sawi.

Army Red hian an match hnuhnung berah point thum mamawh mah se Neroca FC nen 2-2 a an inhnehtawk avangin a vanduai zawkah an ṭang. Army goal hmasa zawk hi Mizo tlangval Francis Zonuntluanga khung a ni nghe nghe.

Services-a tel tur hi Army Red, Army Green, Indian Air Force leh Indian Navy aṭanga player ṭha thlan ṭhin a ni a, he team-a tel pha chin hi chu havildar ah an kaisang nghal ṭhin a ni.

Mizo, Mizo, Mizo!

Neroca FC-ah David Lal-biak-zara a awm a, Champhai tlang-val hian Aizawl FC an hneh ṭumin goal awmchhun a khung.

DSK Shivajians-ah midfielder pathum Vanlalrem-kima (Tetea), Lalṭhathanga (Puitea) leh Sai-ruatkima bakah defender pahnih Zohmingliana Ralte leh Lalnunsiama-te an awm.

DSK defefender Siama hi MPL2 Under 17-a best defender kha a ni a, hemi ṭum hian Tetea hi Aizawl FC Under 17 player pawimawh niin Puitea hi MPL4 best midfielder niin Sairuata hi Dinthar FC tan a khel tawh bawk. Ramhlun South tlangval Zotea hi tawnhriat ngah a ni a, Neroca-a khel David Biakzara hi DSK player hlui niin India camp-ah te pawh a awm tawh.

Durand Cup vawi 128-na semi-final chu vawiin hian khelh a ni dawn a, team pali tana Mizo player an pawimawh hi Mizo mipui tan chhanchin hriat nuam tak a ni.