Derby-a inlan beisei Sane

Manchester City-in pound maktaduai 37-a an lakluh hnua malpui hliam vanga a club thar tana la inlan lo German rawlthar duhawm Leroy Sane chuan naktuk tlai dar 5:00-a Manchester Derby khel turin a dam tawh thu a sawi.

Kum 20-a upa winger chuan, "Ka dam ṭha tawh a, inkhel turin ka inpeih tawh a ni. Ṭha takin training ka nei a, ka malpui hliam a dam tawh bawk avangin City tana ka match hmasa ber ka khelh theih tawh ka beisei," tiin inkhel turin a inpeih tawh hle.

Germany tana vawi li inlan tawh Sane chuan sawi chhunzawmin, "Dik taka sawi chuan tunah hian ka phur tawh takzet a ni. Manchester City tana inlanin point thum hlu tak ka hlawhchhuahpui theih ka beisei. Game harsa tak a ni dawn tih ka hria a, team ṭha zawkin hnehna an chang ang - chu team ṭha zawk chu keimahni kan ni," tiin United lakah a indah sang hle.