Fiahna paltlangtu Serena

Serena Williams chuan US Open semifinal lut turin Simona Halep lakah fiahna hautak a paltlang. American star hian Romanian nula lakah hian 6-2, 4-6, 6-3 in hnehna a chang a, inkhel dangah Karolina Pliskova-a'n Ana Konjuh a hneh ve bawk.

World number 1 Serena hian set khatna a thunun hneh hle a, vawi ruk ngawt ace a siam bakah Halep service vawi thum a chhuhsak bawk. Kum 24-a upa Halep a zam bik lo, set hnihna la let ve lehin set hnuhnung berah pawh 3-1 in hma a hruai hial - mahse, hun pawimawhah tawnhriat ngah Serena a dingchang.

Kum 34-a upa Serena chuan, "Simona khan a khel ṭha hle a, a ball vuak a na in lo dawnsawn a harsa hle. Ka rilruin hnehna ka chang duh a nih chuan set thumnaah hian hmasawn ka ngai ka ti a, ka vannei zui bawk," tiin a sawi.

Seeded pangana Halep hi kumin US Open bika Serena-i service chhuhsak thei hmasa ber niin hunṭha vawi kua a neih aṭangin ṭum hnih a chhawr ṭangkai thei a, set hnihna a lak chiah khan set chhuhsak thei hmasa ber a ni bawk.

Flushing Meadows-a inkhel dangah kum 24-a upa Pliskova chuan a vawi khat nana Grand Slam semifinal lut turin Croatian teenager Ana Konjuh chu 6-2, 6-2 in a hneh ve bawk a ni.

Serena hian a title pasarihna tur a beisei mek a, semifinal-ah seeded 10-na Pliskova chu a hmachhawn leh a, semifinal lehlamah hian seeded pahnihna Angelique Kerber leh Caroline Wozniacki te chu tukin zing khan an inhmachhawn ve bawk.