Chanmari West nge lian BVT?
Mizoram Premier League-ah Chanmari West FC aiin Be-thlehem Vengthlang FC an lut tlai a, vawi li an inkhelh tawhnaah erawh club naupang zawk BVT vawi thum an chak.
Zanin dar 7:00 hian Aizawl veng lian pahnih club-te hi Lammualah an intawng dawn - mipui ṭawiawmna nei ṭha zawk dinhmun a ṭha ang.
I Day Football-a BVT an mual-pho hnuah an insiamṭha leh tawh a, MPL-a an match hmasa berah Zo United 1-0 in an hneh. Chanmari West FC erawh MFA Super Cup-a first division club Chawnpui FC an hneh loh hnuah MPL ṭan niah Chhinga Veng FC an ngam lo.
Chak tum West Warrior
Chanmari West coach HC Zar-zoliana chuan, "Kan match hmasa berah kan chak lo tawh a, kan chak loh leh chuan team dangin min tlansan dawn. Chuvangin BVT lakah hian chak tumin kan khelh a ṭul a ni," tiin chak an mamawh thu a sawi.
West Warrior hian point thum hlawh an tum a nih chuan Chhinga Veng an khelh ṭum aia
ṭha zawka an khelh a ngai dawn - Laldampuia leh R. Laldanmawia te an khelh ṭhat a ṭul bawk ang.
MPL nomawi chawi tawh coach Zara'n sawi chhunzawmin, "BVT ai hian kan ṭha zawkah ka inngai a, khelmuala kan chungnun theihna turin mipui ṭawiawmna kan mamawh tel bawk," tiin Chanmari West mipui inkhel en turin a sawm.
Team ṭha zawk
Bethlehem VT coach Lal-biak-sanga Colney chuan, "Zo United kan hneh ṭum ai khan kan ṭha leh tawh zawk. Chutih rualin kan khingpui tur Chanmari West pawhin hma an sawn ngei ang. Chak an la neih loh avangin an match hmasa ber aiin khelh an harsa zawk dawn," tiin anmahni ang bawka an khingpuiten hma an sawn a rin thu a sawi.
BS-a hnuaia BVT-in MPL an khelh hmasak berah captain Laldingngheta chu man of the match a ni a, goal khungtu chu PC Zosanga a ni. Substitute Lalrinsanga inlan hnuah inkhel a dang a, Lunglei tlangval hian inkhel bul a ṭan tawh ang.
BVT boss BS-a'n sawi chhunzawmin, "League match-ah chuan draw game khelh ṭumte a awm a ngai a, tun ṭum erawh point thum hmuh theihna turah ka ngai," tiin team ṭha zawka a inngaih thu a sawi. MPL4-ah khan BVT-in Chanmari West hi vawi hnih inkhelhah vawi hnih an hneh.