Chanmari an ngui, Dinthar an nui

Chanmari FC-in player ṭha seng lutin Mizo club ṭha ber nih tum mah se, Mizoram Premier League Season 5-a an match hmasa berah Dinthar FC nen 1-1 in an inhnehtawk.

MPL ṭan hmaa rin hlawh lo Reuben Zosangpuia'n minute 45-naah freekick aṭangin Chanmari FC goal hmahruai a khung a, Dinthar veng tlangval Reuben-a'n bench ringawta hun hmang tur a ni bik lo tih a lantir.

Chanmari FC hian inkhel thu-nunin ball pawh chang tam daih mah se substitute Lalhmachhuana (Achhuana) hmanga Dinthar FC harhtharna chan an ngam lo a, minute 75-naa Aizawl FC forward hlui Michael Lalremruata goal khung hmangin MPL champion hmasa berin point hlu tak an hlawh chhuak.

Thil awm dan

Inhliam tam vanga Chanmari FC boss Sanga'n player pawimawh bul a ṭantir theih loh niah season liam taa Dinthar FC player pawimawh Isaac Lalruatpuia an la chhawr thei a, hei hian club pahnih player inthlauhzia a tilang.

Amaherawhchu Malsawmfela tel lohna Chanmari FC-in ball chang tam chungin tlar hma lama hmawr bawk dan an thiam lo a, Dinthar keeper Lalrinhlua tan hna harsa an siam thei lo.

First half tawp hmaa Reuben-a freekick hmangin Chanmari FC-in an phu ang ngeiin hma hruai mah se, second half-ah Kolasib tlangval Achhuana, Michael leh Samuel Laltlanthanga-te vangin Chanmari tlar hnung an buai hle.

Chanmari boss Lalsangzuala Hmar-in player pawimawh R. Malsawmtluanga leh Lalruatfela Zote a luhtir hnuah goal dang an khung belh thei lo a, Dinthar FC zawkin tawnhriat nei ṭha Michael-a hmangin an khung.

Eng nge an sawi?

Chanmari FC coach Lalsang­zuala Hmar chuan, "Kan player-te inthlahdah zeuh vanga point thum hmu lo kan ni a, kan tihsual vang a ni. Chak kan duh avangin kan inkhelh leh hunah chuan tun aia
ṭha zawkin kan khel tawh ang," tiin an khelh danah a lungawi lo.

Dinthar FC coach K. Lalrin­tluanga chuan, "Keini tan chuan Chanmari FC draw theih chu result
ṭha a ni. Achhuana khan kan beiseina a tihlawhtling a, game a thlak danglam a ni. Point hlu tak kan hlawh chhuah avangin kan team boruak pawhin a
ṭhat phah ngei ang," tiin point khatah a lawm tih a zep lo.

Chanmari FC hian Round 3-ah nizan lama inkhel Chhinga Veng an hmachhawn leh dawn a, Dinthar FC khingpui tur chu zanina inlan tur Chanmari West an ni.

Ngaihnawm

• Dinthar FC leh Chanmari FC te MPL bika an inhnehtawk hmasak ber a ni.

• Vawi 14 an inhmachhawn tawhah Chanmari vawi 9 chakin Dinthar FC vawi thum an chak a, vawi hnih dang erawh an inhnehtawk.

• Kolasib tlangval Lalhmachhuana'n MPL a khelh hmasak berah substitute aṭanga lutin man of the match a thlan a ni.

Tute nge inlan?

Dinthar FC (4-1-3-2) : Lalrinhlua; Vanneihtluanga, VL Chhanhima, Lalremtluanga, Zothanzuala (Lalbiakzuala 46'); Joseph Lalṭhafela; R. Lalnunmawia (Saihmingthanga 85'), Lalramengmawia (Lalhmachhuana 61'), Lalbiaknia Pautu; Samuel Laltlanthanga, Michael Lalremruata.

Chanmari FC (4-3-3) : MS Dawngliana; C. Lalrosanga, MS Dawngzela, Lalrinchhana Tochhawng, Thomas Lalengkima; Reuben Zosangpuia (R. Malsawmtluanga 72'), Rosangliana (Lalruatfela Zote 72'), Rochhingpuia; Isaac Lalruatpuia (Lalmuanzova 90'), Lalrammawia, Ṭhasiama.