Bayern hmachhawn hi chona phurawm a ni - Rodgers

Celtic manager Brendan Rodgers chuan Champions League knockout playoff-a Bayern Munich nena an inhmachhawn tur chu an tan chona phurawm a nih thu a sawi a, a naute chu he hun ṭha hi chhawr ngei turin a fuih.

Celtic hi Champions League league phase-ah khan 21-na an ni a, playoff khel turin an tling. Bayern Munich an chang a, German club hi first leg-ah 2-1 in an ngam lo a, zanin dar 1:30 hian Allianz Arena-ah leng lutin, second leg an khel dawn.

Scottish champion Celtic hian Scottish Premiership-ah point 13 ngawtin hma an hruai fal mek a, Champions League nen a boruak erawh a insan hleih dawn tih a chiang - Bayern khelmuala chak a harsa ang!

Mahse, Rodgers chuan, "Engpawh thleng se, kan thlen chinah ka naute hi an lawm tur a ni - chuta ṭang chuan bul kan ṭha ṭha leh bawk ang. Huaisen leh paukhauh taka kan awm kan duh a, chutihrual chuan chapo tur tihna erawh a ni lo.

"Kan hmaa chona inchhawp hi thil hautak a ni tih kan hria a, mahse, kan theihtawp chhuah kan duh. Munich-a kan hmachhawn tur chona hi a phurawm ka ti a, kan hming chherna hun ṭha tak a ni," a ti.

Champions League-ah away goal rule a awm tawh loh avangin Celtic tan hmabak a ko lutuk lo tiin a sawi theih a, chutihrual chuan club pahnih squad thlirin, Scottish club hi Munich khawpuiah an chak a nih chuan result mak zingah chhiar tel a ni ang.