Raducanu chak ve ta

Emma Raducanu chuan a chak lo kaltluang lai chu a titawp ve ta - Pathianni zan khan Dubai Tennis Championship khelh laiah Maria Sakkari hnehin second round a inhlangkai.

British nula Raducanu hian world number 29 Sakkari hi 6-4, 6-2 in a hneh, tun hnaiah a zawna match li chhung tlawm a nih avangin tun ṭuma a chak hi a tan chuan chanchin lawmawm bik a ni ngei ang.

US Open 2021 champion Raducanu chuan, "Kan inkhelh chhung khan thil a danglam nasa hle, a bik takin set hnihna kan khelh lai khan ka service min chhuhsak a, chiai mai thei dinhmunah pawh ka ding hman.

"Amaherawhchu, tun hnaia ka chetsualna ṭhin angah khan ka chesual nawn tawh lo, huaisen taka ka beih let theih danah khan ka lawm," tiin a sawi.

Kum 22 mi Raducanu hian a match lehpekah chuan Karolina Muchova a hmachhawn ang - inkhel dangah Muchova hian Suzan Lamens chu 6-2, 6-2 in a lo hneh ve thung a ni.