Neymar-a'n goal a khung

Santos lama a kir leh hnuah Neymar chuan goal a khung leh ta - Brazilian forward hian nimin zing khan penalty a khung a, a team hi Agua Santa lakah 3-1 in hnehna a chanpui.

Neymar hian tun hma lama a thiamna kha a la theihnghilh lo a, chutihrualin hun rei tak chhung inkhel mumal lo a nih tawh avangin tun hma lam boruak a phak rih lo, ngaiawh leh tumin a bei mek.

A chawr chhuahna Santos tan hian minute 90 khelh tluan a la nei lo, ngai awh leh tur chuan hun pawh a mamawh deuh dawn niin a lang - a tum ber chu Brazil tana World Cup 2026 khel tura inbuatsaih a ni.

Kum 2009-2013 chhung khan Santos tan hian match 225 aṭangin goal 138 a lo khungsak tawh a, chumi hnuah Barcelona a pan - khawvela player man tam ber ni turin Paris Saint Germain a pan zui leh a, chumi hnuah Saudi club Al-Hilal a zawm leh bawk.

Hliam vangin a chawl rei a, a inkhelh theih loh chhung hian Brazil team lamah pawh a hmun ruak hnawhkhat thei an awm lo. Ram tan match 128 a khelh aṭanga goal 79 khung thei a nih avangin, ṭha taka a inkhel chho thei leh ta hi Brazil tan chanchin lawmawm a ni ang.