Inter Milan hnehtu Juventus

Serie A champion lai Inter Milan chuan hmahruaitu nih theihna remchang an nei a, mahse Simone Inzaghi naute hian an bawh pelh - Inter hi Juventus lakah 1-0 in an tlawm a ni.

Pathianni zan Allianz Stadium-a inkhelah Francisco Conceicao chuan goal awmchhun a khung a, an chunga awm Napoli an chetsual karah Inter an che fuh ta lo, an inkarah point hnih a awm.

Hnehna changtu Juventus hian Serie A match 25 aṭanga point 46 hmuin palina dinhmun an luah a, hmahruaitu Naples club an phak lohna chu point 10 a ni thung; khelh hmabak an la neih tam avangin boruak a sang chho zel dawn.

Goal khat

Hremna hmang zo Denzel Dumfries-a'n inkhel bul ṭanin a hlauhawm thei hle a, striker Lautaro Martinez chuan hnai tak aṭangin goal zawnah a pet lo bawk. Damkawr Marcus Thuram a inlan chinah a hlauhawm a, goal erawh a keng tel rih lo.

Randal Kolo Muani-a volley chu mawi viau mah se goal chhungah a kal lo chiah a, minute 74-naah goal kan hmu chauh. France international Kolo Muani hian box lai hma lamah ball kang a la thla a, amah vengtu player pahnih a vir khum.

Paris Saint Germain aṭanga Juve pantu hian box sir lama awm Francisco Conceicao tan a pe zauh a, ani hian goal kil lamah mawi takin a khung zui - midfielder Teun Koopmeiners chuan khung belh teuh hle mah se Yann Sommer a paltlang thei ta lo.

Team pahnihte season tir lam khan San Siro-ah an lo intawng tawh bawk, inkhel hmuhnawm bikah Juventus hi 4-2 in hniam zawk hman mah se a tawpah chuan 4-4 a ni a, tun season kal lai atan chuan Inter tana point hlohna lian tak an ni.

Chak phu

Juventus manager Thiago Motta chuan a tirah duhthusam ang vekin khel lo mah se, second half an khelh danah a lungawi hle tih a sawi a, match pumpui thlir chuan hnehna chan phu zawk an nih thu a sawi chhuak.

Motta chuan, "Team khauh leh hlauhawm tak kan hmachhawn a, a nihna takah chuan first half kha chu a harsa takzet. A sir leh laiah an hlauhawm em em a, kan tan chuan inven dan tur pawh ngaihtuah thiam a harsa hle.

"Mahse, ka naute khan inkhelh dan kalhmang an hrechiang a, zawimuangin inkhel kha kan thunun. A tawpah chuan team ṭha zawk kan ni a, goal kan khung kha chu thuhran ni se la, second half kan khelh danah kha chuan chak phu zawk kan ni," a ti.

Turin club hian tunah chuan Champions League playoff lam an ngaihtuah leh rih a ngai dawn. Nilaini zanlai hian PSV Eindhoven an lenchilh ang - Dutch club lakah hian 2-1 in hma an hruai mek a, tlang turin an goal neih venhim a tawk ang.

Lungawi lo

Inter Milan manager Simone Inzaghi erawhin goal khung theihna remchang ṭha an insiam nual chunga an hlawhtling lo chu pawi a ti a, tlarhma lamin an hna an hlen chhuak lo chu inenfiah an ngai hle tih a sawi ve thung.

Inzaghi chuan, "Lungawi lohna leh lawm lohna tur a awm, a chhan chu goal kan khung loh vang a ni. Chutihrualin, ka naute khan an khel ṭha em em a, team ṭha tak laka khatiang zat hun ṭha insiam theih kha chu a awlsam lo.

"A tawpah chuan goal hi a pawimawh lai a ni leh ṭhin a, a khung lo zawk kan nih miau avangin sawi zui a harsa. Engtiangin nge mahni inveng thiam tak team kan hmachhawn leh hunah goal kan khung theih ang tih chu zir ngai lai a ni," tiin a sawi.

Inter Milan hi chuan Champions League playoff an khelh ve a ngai lo, tunah chuan kar tawpa Genoa nen Serie A match an khelh tur atan an inbuatsaih thei ang - nomawi an kawl lai humhim an tum a nih chuan tha an thlah a thiang lo.