Argentina Open champion Fonseca

Joao Fonseca hi kum 18 mi chauh a la ni a, tennis inelna langsar zinga mi Argentina Open champion a ni thei der tawh! Kum 2006 china piang zingah ATP Tour title la thei hmasa ber a ni hial.

Pathianni a khelh zawh tak Argentina Open final-ah, rawlthar Fonseca hian tualchhung player ṭan hlawh tak mai Francisco Cerundolo chu 6-4, 7-6(1) in a hneh, a tan chuan nomawi chawi bakah world number 28 hneh hi mellung pawimawh a ni.

Brazilian mi Fonseca chuan, "Ka tan chuan chawlhkar nuam leh theihnghilh ngai tawh loh tur a ni. Argentina ramah kan inkhel a, kei chu Brazilian mi ka ni si, chutiang chung chuan min ṭantu an awm kha a mak.

"A hmuna inkhel entu zawng zawng khan ka khingpui kha an ṭan vek mai ka ring a, mahse infiamna ropuizia chiang takin ka hmu. Kan ramah pawh hetiang hi a thleng ve ṭhin ngei ang ka ring," tiin a sawi.

Fonseca hian Australian Open pawh kha a khel phak a, season khat chhunga Grand Slam hmasa berah khan match thum chhung chu set hloh miah loin a chak, mahse a hnuah world number 9 Andrey Rublev a ngam ta lo a ni.