Stamford Bridge a la nghet tawk lo Liverpool-in khualmualah Chelsea an ngam

Pathianni zan Premier League inkhelah Liverpool chuan an nomawi humhim an tum tih an pholang nawn a, khualmualah Chelsea chu 2-0 in an hneh. 

First half hun pek belhah Chelsea defender Andreas Christensen hnawhchhuah a nih avangin player 10 ni chungin Chelsea-in minute 45 chhung hun an hmang a, Christensen hnawhchhuah a nih hma pawha Liverpool-in inkhel an thunun avangin chhuanlam atan erawh a tling tawk lo. 

Liverpool tan Sadio Mane chuan 'world class' player a ni tih pholang nawnin goal hnih a khung a, hetihlai hian Blues keeper Kepa Arrizabalaga chuan tihsual a neih leh tak avangin Chelsea-a a dinhmun a nghet lo chhunzawm zel. 

Player kim loa Chelsea-in hun an hman tam zawk avangin a hmuhnawm tur angin inkhel a hmuhnawm tawk lo a, Chelsea hi Liverpool-te nen huang khata dah tur chuan an la nau hret niin a lang bawk. 

Stamford Bridge-a inkhelah Liverpool-in a bul ṭantirh phat aṭangin Chelsea an ngam a, chutihrual chuan club pahnih hian chance duhawm tia sawi tur erawh an nei lawk lo. .

First half tawp hnaih lamah Reds captain Jordan Henderson chuan Chelsea tlarhnung awl lai hmu fuhin ṭha zetin ball a thlawh lut a, he ball um luttu Sadio Mane tan goal khungna remchang a ni. 

Mahse, Chelsea defender Christensen-a'n Mane dan theih dan ṭha ber nia a hriat hmangin Senegalese forward hi a kut khing hniha kuah chungin a bawh thlu.

Danish defender hi yellow card pek zet ni mah se video assistant referee hmanga ennawn a nih hnuah hnawhchhuah a ni a, goal khungna ngei tura ngaiha a foul vang a ni. 

Chelsea-in player 10 ni chungin first half an khar a, football expert kher lo tan pawh Liverpool chak tur thu hrilhlawk chu thil inthlahrunawm a ni tawh lo - minute 50-naah Mane chuan goal hmahruai a rawn khung. 

Sadio Mane goal khung hi Roberto Firmino siamsak a ni a, goal-a tauh luh danah Senegalese forward-in fak a phu tluk zetin assist neitu Firmino ball pek duhthusam sawi hmaih a harsa. 

Minute li pawh a liam hman lo. Mane bawk kan hmu nawn a, Chelsea goalkeeper manto Kepa tihsual nangchingin an goal hnihna a khung - chak tur a chiang tawh. 

Chelsea-in hnai takah Liverpool inkhel an en ni berin a lang a, chutihrual chuan penalty pet thiam bik Jorginho-a penalty kha Alisson-a'n dang lo se chuan inkhel boruak a danglam ve thei bawk. 

Blues manager Frank Lampard-a'n top four 'fight' tur ni loin champion team din a tum thu a sawi a, mahse league lama an match hmasa pahnih aṭanga teh tur a nih chuan Blues tan hian top four pawh a hautak dawn. 

Chutihrual chuan Chelsea hian an ṭhat dan berin an la khel lo tih hriat a ṭha a, nipui transfer-a beiseina sang tak nena an lakluh Thiago Silva, Ben Chilwell leh Hakim Ziyech te an la inkhel thei lo. 

Hetihrual hian Chelsea hian insiamrem tura hun an duh rei lutuk chuan an tlai chhe duai ve thei tho tih a lang a, Frank Lampard hi player ṭha tak ni ṭhin mah se Zinedine Zidane an selna ang deuhin 'tactical' taka game enkawl hi a harsat niin a lang. 

Kepa tihsual kha khawvela goalkeeper manto ber tihsual atan chuan awm lo deuh mah se tlarhnung lama ball thiam tak defender nei lo chunga an ball inpek kual nasat rah ti pawhin a sawi theih a, Rennes keeper Edouard Mendy lakluh an tum thu a rik reng laia inrintawkna tlachham Kepa-a'n game boruak sanga a tisual kha a mak lo. 

Liverpool captain Henderson chu hliam vangin lakchhuah a ngai a, second half-ah player thar Thiago Alcantara chuan English midfielder hmun ruak hi rawn luahin a hmuhnawm 

takzet. 

Kum 29 mi midfielder hian khelmualah minute 45 lek hun a hmang chungin vawi 75 zet pass dik a rawn nei hman a, vawi 89 zet ball a tawk fuh - Chelsea player zingah khan a pass dik zat pass dik thei an awm lo a, a ball tawh fuh zat tawk fuh thei an awm lo bawk. 

Vawi 75 zet pass dik a neih kha Premier League record a ni zui - 2003-04 season aṭanga statistics mumal tak a awm hnuah minute 45 chhung leka khati zat pass dik nei thei player kha an la awm ngai lo. 

Bayern Munich midfielder hlui hi pound maktaduai 20 man a ni a, a khelh ṭhat dan a zira pound maktaduai nga pek belh tur hi Liverpool hian an pek belh ngei a rinawm - hetihrual hian a man hi instalment-a pek tur a ni a, Reds tan chuan 'lap hlang' tiin sawi ila, sawi uar lutuk kan ni lo ang.