Man United-in Leeds an sawp!

Kum 16 hnuah Leeds United chu Premier League khel turin Old Trafford-ah an lenglut a, minute thum chhung lekin Manchester United-in goal hnihin hma an hruai. Minute 90 a zawh chuan Ole Gunnar Solskjaer-a hote 6-2 in an chak.

Pathianni zan inkhel hmuhnawmah hian Scott McTominay leh Bruno Fernandes ten goal hnih an khung a, Victor Lindelof leh Daniel James ten goal khat ve ve an khung. Leeds tana Liam Cooper leh Stuart Dallas te goal khungin scoreline a ti mawi pha lo.

Manchester United-in attacking game khel ṭhin Leeds United lakah counter attack hmanga an nawr a rinawm. Amaherawhchu rin lawk loh thil a thleng. Minute thum chhung lekin McTominay-a'n goal hnih a khung nghal. Scottish midfielder hi Premier League-a ṭan chiah minute thuma goal hnih khung hmasa ber a ni.

Goal khung zen zen loh Tominay-a finishing ṭha lutuk chu a mak a, bul ṭan ṭha ṭhin lo United hi ṭan phatah an che ṭha. Old Trafford-ah Solskjaer-a hoten game hmuhnawm bik an khel - 

a mak hle.

Leeds-in goal hnih chhuah mah se an rilru put hmang an thlak lo. Goal khung tumin na takin an nawr. Patrick Bamford-a'n a ke chhe lamin (ding lam) chance ṭha bik a hlah a, a ke ṭha lama a pet goal erawh offside vangin pawm a ni lo.

Manager kal khat Bielsa-a'n 2-0 emaw 4-0 emaw 4-1 emaw 6-1 emaw 6-2 emaw a nih laitein a naute a nawr tir hmiah hmiah. Man United an khelh ṭhat avangin Leeds-in chak an phu lo a, amaherawhchu an chance neih dan thlirin goal hnih ringawt tur chu a ni lo.

Liam Cooper leh Stuart Dallas goal mawi tak bak hi chance ṭhahnem tak an nei a, goal hmaa an hriam tawk loh bakah keeper David de Gea a che ṭha ve bawk. Leeds manager Marcelo Bielsa chuan, "Thawhchhuah theihna hun kan nei a, mahse hun ṭha kan bawhpelh. Kan chance kan hlah laiin anni chuan an khung. A tawp thlengin theihtawp kan chhuah a, kan tih tur kan ti," tiin chak lo mah se lawmna tur a hmu.

United-in Bruno Fernandes an ṭang-kaipuizia sawi nawn a ngai tawh lo a, goal thumna ṭha zeta a khung bakah Anthony Martial-a penalty hlawhchhuah a khung. Victor Lindelof-a'n tlarhnunga chet ṭhat duh tawk loin goal a khung tel a, first eleven-ah Daniel James a tel hlawl a, goal ṭha zet a khung bawk.

Second half-a rawn lut Edinson Cavani pawhin chance ṭha a nei. Mahse - Fred, Marcus Rashford leh Anthony Martial te ang thoin goal hmaah a vannei lo. Man United-in match khata khel tlemin pathumna an luah pha a, an khelh hmabakah hnehna an chan phei chuan hmahruaitu Liverpool nen an inkarah point hnih chiah a awm ang.

Manchester United manager Ole Gunnar Solskjaer chuan, "Football game ropui tak a ni a, entu an awm lo kha a pawi lai chu a ni. Manchester United leh Leeds te inkhel chanchin an sawi apiangin zanin inkhel hi sawi tel a ni tawh ang," tiin an khelh danah a lungawi hle. 

Solskjaer-a hote hian Nilaini zan dar 1:30-ah Everton nen League Cup quarterfinal an khel ang a, Inrinni zanah Leicester City an hmachhawn lehnghal dawn. Inkhel pawimawh pahnih hi khualmuala khelh ve ve tur a ni.